Us Ko Juda Hoye Bhi Zamana Bohat Hua Ab Kya Kahen Ye Qissa Purana Bohat Hua

Us Ko Juda Hoye Bhi Zamana Bohat Hua
Ab Kya Kahen Ye Qissa Purana Bohat Hua

Dhalti Na Thi Kisi Bhi Jatan Se Shab-e-firaq
Ai Marg-e-na-gahan Tera Aana Bohat Hua

Ham Khuld Se Nikal To Gaye Hain Par Ai Khuda
Itne Se Waqiye Ka Fasana Bohat Hua

Ab Ham Hain Aur Sare Zamane Ki Dushmani
Us Se Zara Sa Rabt Barhana Bohat Hua

Ab Kyun Na Zindagi Pe Mohabbat Ko Waar Dain
Is Aashiqi Mein Jaan Se Jana Bohat Hua

Ab Tak To Dil Ka Dil Se Ta’aaruf Na Ho Saka
Mana Ki Us Se Milna Milana Bohat Hua

Kya Kya Na Ham Kharaab Hoye Hain Magar Ye Dil
Ai Yaad-e-yaar Tera Thikaana Bohat Hua

Kahta Tha Naasehon Se Mere Munh Na Aaiyo
Phir Kya Tha Ek Huu Ka Bahaana Bahut Hua

Lo Phir Tire Labon Pe Usi Bewafa Ka Zikr
Ahmad ‘faraz’ Tujh Se Kaha Na Bohat Hua