Giran Guzarne Laga Daur e Intezar Mujhe Zara Thapak Ke Sula De Khayaal e Yaar Mujhe

Giran Guzarne Laga Daur e Intezar Mujhe
Zara Thapak Ke Sula De Khayaal e Yaar Mujhe

Na Aaya Gham Bhi Muhabbat Mein Saazgaar Mujhe
Woh Khud Tadap Gae Dekha Jo Be-Qaraar Mujhe

Nigaah e Sharamgeen Chupke Se Le Udi Mujh Ko
Pukaarta Hi Raha Koi Baar Baar Mujhe

Nigaah e Mast Ye Ma'ayar e Be-Khudi Kiya Hai
Zamane Wale Samajhte Hain Hoshiyaar Mujhe

Baja Hai Tark e Ta'alluq Ka Mashwara Lekin
Na Ikhtiyaar Unhein Hai Na Ikhtiyaar Mujhe

Bahaar Aur Ba-Qaid e Khizaan Hai Nang Mujhe
Agar Mile Tou Mile Mustaqil Bahaar Mujhe
Asad Bhopali