ہجر میں درد کا سورج پگھلنے والا ہے
عروقِ جان میں لاوا اُبلنے والا ہے
حصارِ دل کو ذرا اور پختگی دے دوں
تمھاری یاد کا لشکر نکلنے والا ہے
مرے زوال پہ ایسے نہ مسکرا کہ یہاں
ترے عروج کا سورج بھی ڈھلنے والاہے
بچا سکو تو بچا لو کہ قلبِ افسردہ
ترے فراق کی آتش میں جلنے والا ہے
خدا کی دین وہ آنکھیں دکھا رہا ہے مجھے
جو میرے جسم کے ٹکڑوں پہ پلنے والا ہے
نہ چھوڑ حوصلہ غم میں کہ جلد ہی عاصم
یہ وقت تجھ پہ جو آیا ہے ٹلنے والا ہے
عاصم حجازی
No comments:
Post a Comment