Guzray Huay Taweel Zamanay Ke Baad Bhi Dil Main Raha Wo Chor Ke Janay Ke Baad Bhi

Poet:Adeem Hashmi

Guzray Huay Taweel Zamanay Ke Baad Bhi
Dil Main Raha Wo Chor Ke Janay Ke Baad Bhi

Pehlu Main Reh Ke Dil Ne Dia Hai Bohat Faraib
Rakha Hai Us Ko Yaad Bhulanay Ke Baad Bhi

Qurbat Ke Baad Aur Bhi Qurbat Ki Talash
Dil Mutmain Nahin Hai Teray Aanay Ke Baad Bhi

Go Tu Yahan Nahin Hai Mager Tu Yahein Pe Hai
Tera Hi Zikar Hai Teray Janay Ke Baad Bhi

Lagta Hai Kuch Kaha Hi Nahin Hai Ussay Adeem
Dil Ka Tamam Haal Sunanay Ke Baad Bhi