Wo damakti hui lau kahani hui wo chamakdar shola fasana hua Wo jo uljha tha wehshi hawa se kabhi, us diye ko bujhe to zamana hua

وہ دَمکتی ہوئی لَو کہانی ہوئی وہ چمکدار شعلہ فسانہ ہُوا
وہ جو اُلجھا تھا وحشی ہَوا سے کبھی، اُس دِیئے کو بُجھے تو زمانہ ہُوا
Wo damakti hui lau kahani hui wo chamakdar shola fasana hua
Wo jo uljha tha wehshi hawa se kabhi, us diye ko bujhe to zamana hua

 
ایک خُوشبو سی پھیلی ہے چاروں طرف اُس کے امکان کی، اُس کے اعلان کی
رابطہ پھر بھی اُس حُسنِ بے نام سے جس کا جتنا ہوا غائبانہ ہُوا
Aik khushbu si phaili hai charon taraf us ke imkan ki us ke elan ki
Rabta phir bhi us husn e be naam se jis ka jitna hua, gha’ibana hua

 
باغ میں پُھول اُس روز جو بھی کِھلا، اُس کے بالوں میں سجنے کو بے چین تھا
جو ستارہ بھی اُس رات روشن ہُوا اُس کی آنکھوں کی جانب روانہ ہُوا
Bagh mein phool us roz jo bhi khhila, us ke baalon mein sajne ko bechain tha
Jo sitara bhi us rat raushan hua us ki ankhon ki janib ravana hua

 
کہکشاں سے پَرے، آسماں سے پَرے، رہگزارِ زمان و مکاں سے پرے
مجھ کو ہر حال میں ڈھونڈنا تھا اُسے یہ زمیں کا سفر تو بہانہ ہُوا
Kehkashan se pare, asman se pare rehguzaar e zaman o makan se pare
Mujh ko har haal mein dhoondna tha usay, ye zameen ka safar to bahana hua

 
اب تو اُس کے دِنوں میں بہت دُور تک آسماں ہیں نئے اور نئی دُھوپ ہے
اب کہاں یاد ہو گی اُسے رات وہ جس کو گزرے ہوئے اِک زمانہ ہُوا
Ab to us ke dinon mein bohat door tak asman hain naye aur naiy dhoop hai
Ab kahan yad ho gi usay rat wo jis ko guzre huay ek zamana hua

 
موسمِ وصل میں خُوب ساماں ہوئے، ہم جو فصلِ بہاراں کے مہماں ہوئے
گھاس قالین کی طرح بِچھتی گئی سر پہ ابرِ رواں شامیانہ ہُوا
Mausam e wasl mein khoob saman huay, hum jo fasl e baharan ke mehman huay
Ghhaas qaleen ki tarah bichhti gaiy sar pe abr e ravan shamiana hua

 
اب تو امجدؔ جُدائی کے اُس موڑ تک درد کی دُھند ہے اور کچھ بھی نہیں
جانِ من، اب وہ دن لَوٹنے کے نہیں، چھوڑئیے اب وہ قصّہ پرانا ہُوا
Ab to Amjad judaiy ke us mor tak dard ki dhund hai aur kuch bhi nahi
Jan e man, ab wo din lautne ke nahi, chhoriye ab wo qissa purana hua

 
امجد اسلام امجدؔ
Amjad Islam Amjad