Ab Ke Tajdeed-e-Wafa Ka Nahi Imkan Janaan,Yaad Kia Tujhko Delaen Tera Paimaan Janaan

ایک قافیہ اور ردیف

ﺍﺏ ﮐﮯ ﺗﺠﺪﯾﺪِ ﻭﻓﺎ ﮐﺎ ﻧﮩﯿﮟ ﺍﻣﮑﺎﮞ ﺟﺎﻧﺎﮞ
ﯾﺎﺩ ﮐﯿﺎ ﺗﺠﮫ ﮐﻮ ﺩﻻﺋﯿﮟ ﺗﯿﺮﺍ ﭘﯿﻤﺎﮞ ﺟﺎﻧﺎﮞ

ﯾﻮﮞ ﮨﯽ ﻣﻮﺳﻢ ﮐﯽ ﺍﺩﺍ ﺩﯾﮑﮫ ﮐﮯ ﯾﺎﺩ ﺁﯾﺎ ﮨﮯ
ﮐﺲ ﻗﺪﺭ ﺟﻠﺪ ﺑﺪﻝ ﺟﺎﺗﮯ ﮨﯿﮟ ﺍﻧﺴﺎﮞ ﺟﺎﻧﺎﮞ

ﺯﻧﺪﮔﯽ ﺗﯿﺮﯼ ﻋﻄﺎ ﺗﮭﯽ ﺳﻮ ﺗﯿﺮﮮ ﻧﺎﻡ ﮐﯽ ﮨﮯ
ﮨﻢ ﻧﮯ ﺟﯿﺴﮯ ﺑﮭﯽ ﺑﺴﺮ ﮐﯽ ﺗﯿﺮﺍ ﺍﺣﺴﺎﮞ ﺟﺎﻧﺎﮞ

ﺩﻝ یہ ﮐﮩﺘﺎ ﮨﮯ کہ ﺷﺎﯾﺪ ﮨﻮ ﻓُﺴﺮﺩﮦ ﺗﻮ ﺑﮭﯽ
ﺩﻝ ﮐﯽ ﮐﯿﺎ ﺑﺎﺕ ﮐﺮﯾﮟ ﺩﻝ ﺗﻮ ﮨﮯ ﻧﺎﺩﺍﮞ ﺟﺎﻧﺎں

ﻣﺪﺗﻮﮞ ﺳﮯ ﯾﮩﯽ ﻋﺎﻟﻢ نہ ﺗﻮﻗﻊ نہ ﺍﻣﯿﺪ
ﺩﻝ ﭘﮑﺎﺭﮮ ﮨﯽ ﭼﻼ ﺟﺎﺗﺎ ﮨﮯ ﺟﺎﻧﺎں ﺟﺎﻧﺎﮞ

ﺟﺲ ﮐﻮ ﺩﯾﮑﮭﻮ ﻭﮦ ﮨﯽ ﺯﻧﺠﯿﺰ ﺑﭙﺎ ﻟﮕﺘﺎ ﮨﮯ
ﺷﮩﺮ ﮐﺎ ﺷﮩﺮ ﮨﻮﺍ ﺩﺍﺧﻞ ﮨﻮﺍ ﺯِﻧﺪﺍﮞ ﺟﺎﻧﺎﮞ

ﮨﻢ کہ ﺭﻭﭨﮭﯽ ﮨﻮئی ﺭُﺕ ﮐﻮ ﺑﮭﯽ ﻣﻨﺎﻟﯿﺘﮯﺗﮭﮯ
ﮨﻢ ﻧﮯ ﺩﯾﮑﮭﺎ ﮨﯽ نہ ﺗﮭﺎ ﻣﻮﺳﻢ ﮨﺠﺮﺍﮞ ﺟﺎﻧﺎﮞ

احمد فراز
****************
ہم کہاں اور تم کہاں جاناں
ہیں کئی ہجر درمیاں جاناں

رائیگاں وصل میں بھی وقت ہوا
پر ہوا خوب رائیگاں جاناں

میرے اندر ہی تو کہیں گم ہے
کس سے پوچھوں ترا نشاں جاناں

عالم بیکرانِ رنگ ہے تو
تجھ میں ٹھہروں کہاں کہاں جاناں

میں ہواؤں سے کیسے پیش آؤں
یہی موسم ہے کیا وہاں جاناں؟

روشنی بھر گئی نگاہوں میں
ہو گئے خواب بے اماں جاناں

درد مندانِ کوئے دلداری
گئے غارت جہاں تہاں جاناں

اب بھی جھیلوں میں عکس پڑتے ہیں
اب بھی ہے نیلا آسماں جاناں

ہے جو پر خوں تمہارا عکس خیال
زخم آئے کہاں کہاں جاناں

جون ایلیا
****************
میں یہاں اور تو وہاں جاناں
درمیاں سات آسمان جاناں

ہم نہیں ہوں گے اور دنیا کو
تو سنائے گا داستاں جاناں

دیکھنے میں تو کچھ نہیں لیکن
اک زمانہ ہے درمیاں جاناں

رو رہے پرند شاخوں پر
جل گیا ہو گا آشیاں جاناں

اور اک محبت میرا اثاثہ ہے
اور اک ہجر بہ کراں جاناں

یہ تو سوچا نہ تھا کبھی آنسو
ایسے جائیں گے رائیگاں جاناں

میں تیرے بارے میں کچھ غلط کہہ دوں
کٹ نہ جائے میری زباں جاناں

فرحت عباس شاہ
****************
کوئی آہٹ نہیں آتی سرِ دشتِ گُماں جاناں
غُبارِ راہ کو تکتے ہوئیں آنکھیں دھواں جاناں

چمکتا ہے ہمارے نام کا تارا جہاں جاناں
نجانے کس افق کے پار ہے وہ کہکشاں جاناں

مجھے یہ وہم لاحق تھا، در و دالان ہیں میرے
مجھے یہ خوش گمانی تھی، مرا ہے یہ مکاں جاناں

تمہاری گفتگو سنتی رہی دنیا، پہ دم بھر میں
ہماری خوش کلامی بھی بنی اِک داستاں جاناں

مری دہلیز پر صدیوں سے ہے پہرا عذابوں کا
مجھے اِذنِ سفر کب ہے جو کھولوں بادباں جاناں

عجب بے چارگی ہے، ہر طرف ہیں خوف کے پہرے
جہانِ ہست کی وحشت میں ہوں بے سائباں جاناں

قفس کے اُس طرف پہنچے کبھی میری کہانی بھی
اُفق کے پار بھی جائے کبھی میری فغاں جاناں

کبھی مجھ کو پکارو تو مرے اپنے حوالے سے
تمہارے ہاتھ پہ رکھ دوں زمین و آسماں جاناں

عنبرین صلاح الدین
****************
سوچ کے کرنا کوئی ، پیمان جاناں
وقت نہی رہتا سدا ، مہربان جاناں

موسم ، وقت ، قسمت سب تُم جیسے
کب بدل جائیں ، گردش دوران جاناں

ممکن نہی ہے ہجرت ، روحِ قلوب سے
دل وہ بِن بام و در کا ، زندان جاناں

صحرا ، دشت ، شب ، ہُو کا عالم
ہجر میں ہوا ہے دل ، بیابان جاناں

اغراض ہوتے ہیں عنایتوں کے پیچھے
یونہی لوگ نہیں ہوتے مہربان جاناں

درخت پہ لکھے نام مٹ جاتے ہیں
کتنے ہی انمٹ ہوں ، نشان جاناں

دو دن جواں رُت پہ زعم بے معنی
کون رہا ہے عمر بھر جوان جاناں

کاروبار میں ہوتا ہے ، نفع در نفع
عشق تو ہے سراسر نُقصان جاناں

خوابِ مُحبت ہے ، سب خواب غفلت
زندگی تو ہے سخت امتحان جاناں

عشق عنوان ِ ہوس ہے دور جدید کا
بن جاتے ہیں لوگ اب حیوان جاناں

ادائیگیِ سود و اصل کے ، باوجود
عشق ادا کرتا ہے تاعمر لگان جاناں

قید سے کب کہیں کوئی جا سکا
عشق مانگتا ہے ہونا قُربان جاناں

ہجر مار ڈالے ، پتھر دلوں کو بھی
عاشق بھی تو ہیں ، انسان جاناں

آنکھ جھیل ، لب گُلاب ، قد دراز
سُنہری رنگت ، آبرو کمان جاناں

جہاں بتائے ، چند لمحے وصال کے
یاد کرتا ہے وہ ، کچّا مکان جاناں

میرے حال کی ہے تفسیر تیری
زیرِ لب مچلتی ، مُسکان جاناں

اظہار ہر بات کا لازم تو نہیں ہے
سمجھ دھڑکنوں کی زبان جاناں

 شھزادہ کبیر
****************
گلبدن، غُنچہ دہن، سروِ خراماں جاناں
سر سے پا تک ہے ترا حُسن نمایاں جاناں
دُرِ دنداں سے خجل دُرِ عدن ہے تیرے
روئے انور ہے ترا لعلِ بدخشاں جاناں
چشمِ میگوں سے ہے سرشار یہ پیمانۂ دل
روح پرور ہے فروغِ رُخِ تاباں جاناں
دیکھ کر بھول گیا تجھ کو سبھی رنج و الم
سر بسر تو ہے علاجِ غمِ دوراں جاناں
تیرہ و تار تھا کاشانۂ دل تیرے بغیر
رُخِ زیبا ہے ترا شمعِ شبستاں جاناں
لوٹ آئی ہے ترے آنے سے اب فصلِ بہار
تھا خزاں دیدہ مرے دل کا گلستاں جاناں
ہیچ ہیں سامنے تیرے یہ حسینانِ جہاں
میری نظروں میں ہے تو رشکِ نگاراں جاناں
کچھ نہیں دل میں مرے تھوک دے غصہ تو بھی
میں بھی نادم ہوں اگر تو ہے پشیماں جاناں
موجِ طوفانِ حوادث سے گذر جاؤں گا
کشتئ دل ہے یہ پروردۂ طوفاں جاناں
تو ہی ہے خواب کی تعبیرِ مجسم میرے
ماہِ تاباں کی طرح جو ہے درخشاں جاناں
یہ مرا رنگِ تغزل ہے تصدق تجھ پر
سازِ ہستی ہے مرا تجھ سے غزلخواں جاناں
ہے کہاں طبعِ رسا میری کہاں رنگِ فراز
یہ جسارت ہے مری جو ہوں غزلخواں جاناں
روح فرسا ہے جدائی کا تصور برقی

دل پُکارے ہی چلا جاتاہے جاناں جاناں

ڈاکٹر احمد علی برقی اعظمی
****************
عہدِ حاضر میں ہے ہر شخص پریشاں جاناں
نہیں انسان سے بڑھ کر کوئی حیواں جاناں
جس طرف دیکھو اُدھر دوست نُما دشمن ہیں
آگیا دام میں جن کے دلِ ناداں داناں
غمِ دوراں سے ہو فرصت تو میں سوچوں کچھ اور
روح فَرسا ہے مری تنگئ داماں جاناں
میری غزلوں میں ہے جو سوزِ دُروں آج نہاں
میری رودادِ محبت کا ہے عُنواں جاناں
مجھ پہ جو گذری ہے اب تک نہ کسی پر گذرے
آئینہ دیکھ کے اب مجھ کو ہے حیراں جاناں
آپ بیتی ہیں مری میری غزل کے اشعار
سن کے سب لوگ ہیں انگشت بدنداں جاناں
ذہن ماؤف ہے برقی کا غمِ دوراں سے

 دل پکارے ہی چلے جاتا ہے جاناں جاناں

ڈاکٹر احمد علی برقی اعظمی
****************
تھا مرا خانۂ دل بے سروساماں جاناں
اِس میں وحشت کے تھے آثار نمایاں جاناں
تو ہی افسانۂ ہستی کا ہے عنواں جاناں
سازِ دل دیکھ کے تجھ کو ہے غزلخواں جاناں
کیا ہوا کچھ تو بتا کیوں ہے پریشاں جاناں
آئینہ دیکھ کے کیوں آج ہے حیراں جاناں
شکریہ یاد دہانی کا میں ہوں چشم براہ
یاد ہے وعدۂ فردا ترا ہاں ہاں جاناں
تجھ سے پہلے تھا یہاں صرف خزاں کا منظر
تیرے آنے سے ہے اب فصلِ بہاراں جاناں
بال بانکا نہیں کرسکتا ترا کوئی کبھی
میں ترے ساتھ ہوں تو مت ہو حراساں جاناں
مُرتعش پہلے تھا برقی یہ مرا تارِ وجود
جانے کیوں آج پھڑکتی ہے رگِ جاں جاناں

احمد علی برقی اعظمی
****************
ہم سا بھی ہو گا نہ جہاں میں کوئی ناداں جاناں
بے رخی کو بھی جو سمجھے تیرا احساں جاناں
جب بھی کرتی ہے میرے دل کو پریشاں دنیا
یاد آتی ہے تیری زلفِ پریشاں جاناں
میں تیری پہلی نظر کو نہیں بھولا اب تک
آج بھی دل میں ہے پیوست وہ پیکاں جاناں
مجھ سے باندھے تھے بنا کر جو ستاروں کو گواہ
کر دیے تو نے فراموش وہ پیماں جاناں
کبھی آتے ہوئے دیکھوں تجھے اپنے گھر میں
کاش پورا ہو میرے دل کا یہ ارماں جاناں
اک مسافر کو تیرے شہر میں موت آئی ہے
شہر سے دور نہیں گورِ غریباں جاناں
یہ تیرا حسن یہ بے خود سی ادائیں تیری
کون رە سکتا ہے ایسے میں مسلماں جاناں
کیوں تجھے ٹوٹ کے چاہے نہ خدائی ساری
کون ہے تیرے سوا یوسف دوراں جاناں؟
جاں بلب، خاک بسر، آہ بہ دل، خانہ بدوش
مجھ سا کوئی بھی نہ ہو بے سر و ساماں جاناں
یہ تو پوچھ اس سے جس پر یہ بلا گزری ہے
کیا خبر تجھ کو کہ کیا ہے شبِ ہجراں جاناں
یہ وە نسبت ہے جو ٹوٹی ہے نہ ٹوٹے گی کبھی
میں تیرا خاک نشیں، تو میرا سلطاں جاناں
وە تو اک تمہارا ساتھ تھا کہ آڑے آیا
ورنہ دھر لیتی مجھے گردشِ دوراں جاناں
کیا تماشہ ہو کہ خاموش کھڑی ہو دنیا
میں چلوں حشر میں کہتے ہوئے جاناں جاناں
در پہ حاضر ہے ترے آج نصیرِ عاصی
تیرا مجرم تیرا شرمندۂ احساں جاناں

سید نصیر الدین نصیر
****************

مختلف قافیے...ایک ردیف

جاناں

غم ہے دِل کے حساب کا جاناں
وہ جو سب کُچھ تھا کیا ہُوا جاناں

تُم ہو آغوش میں مگر پِھر بھی
دِل نہیں لگ رہا مِرا جاناں

مَیں بھی کُچھ بھی نہیں تھا اور تُم بھی
یعنی جو کُچھ تھا خواب تھا جاناں

شہرِ تعبیر ہو گیا آباد
خواب برباد ہو گیا جاناں

مَیں نے کیا کُچھ کہا نہیں معلُوم
تُم جو ہو تُم نے کیا سُنا جاناں

ہم نے سمجھا تھا جس کو رشتہء جاں
کِسی لمحے کا حال تھا جاناں

یہ نہ پُوچھو بِچھڑ کے تُم سے مُجھے
کِے برس اِس کا غم رہا جاناں

ہم ہیں محرومِ وسعت یک گام
میر کو لکھنؤ مِلا جاناں

کیا سُنائیں تُمہیں حکایتِ دِل
ہم کو دھوکا دیا گیا جاناں

ہے خُدا سے مناظرہ درپیش
آ گیا کون تیسرا جاناں

ہے وہ غُربت کہ اب مِرے دِل میں
کُچھ نہیں ہے مِرے سِوا جاناں

اُسی عالم میں مُبتلا ہُوں مَیں
وہ جو عالم ہے شہر کا جاناں

کِس سے ہم اپنے دِل کی بات کریں
شہرِ دِلّی نہیں رہا جاناں

ہم وہاں ہیں ہمارے ساتھ جہاں
میر بھی خُون تُھوکتا جاناں

کیا غمِ ہِجر اور عیشِ وِصال
اِک تماشا ہُوا کیا جاناں

کیا بتاؤں ہے کتنی پُراحوال
حالتِ ترکِ مُدّعا جاناں

اب ہمیں زِندگی گُزارنی ہے
یعنی وہ کھیل ہو چُکا جاناں

کاش تُم سچ کے حال میں ہوتے
اور مَیں جھُوٹ بولتا جاناں

ہم کو گرداب میں ہے اِک اُمید
پر کہیں بھی نہیں خُدا جاناں

مَیں بھی اب بے گِلہ ہُوں اور تُم بھی
یعنی کُچھ بھی نہیں بچا جاناں

مُجھ پہ اور تُم پہ جِس کا تھا احساں
کل وہ قاصد بھی مر گیا جاناں۔۔۔

جون ایلیا
****************

یہی ہونا تھا اور ہُوا جاناں
ہوگئے ہم جُدا جُدا جاناں

کوئی آساں نہ تھی تِری فرقت
میں حقیقت میں روپڑا جاناں

تِرے اندر ہوں میں ہی میں ہرسُو
مِرے اندر تُو جابجا جاناں

ہنس کے ملتا ہے ہرکوئی ایسے
جیسے ہر شخص ہو خفا جاناں

اب میں چلتا ہوں چل خُدا حافظ
شہر یہ وہ نہیں رہا جاناں

عارف اشتیاق
****************
تُمہارے ٹھاٹھ بھی اپنی جگہ سارے بجا جاناں
مگر یکساں رہے کب تک زمانے کی ہَوا جاناں

ہماری آن جائے ربطِ باہم میں کہ جاں جائے
نہیں ہٹ کر اب اِس سے کوئی رستا دُوسرا جاناں

جہاں بھی تُم نے دیکھا والہانہ ہم یہی سمجھے
کماں سے تیر نِکلا اور نشیمن کو چلا جاناں

اب اُس تِنکے کو بھی مُٹّھی میں دریا نے کِیا اپنی
ازل سے ڈُوبنے والوں کا تھا جو آسرا جاناں

مَہک کا اور صبا کا تھا مِلن گاہے ملاپ اپنا
دِلانے یاد آتی ہے ہمیں کیا کُچھ صبا جاناں

اُسی کی بُھربُھری بُنیاد سے چِمٹا ہے اب تک یہ
وہی جو قول ماجد کو کبھی تُم نے دِیا جاناں۔۔۔

ماجد صدیقی
****************
تو نہیں جب کہیں ہوا جاناں
کون پھر مجھ کو بھا گیا جاناں۔

نہ ملی ایسی بھی مثال_وفا
میں رہا سب سے بے وفا جاناں۔

نیند آئی نہ اک زمانے سے
وہ میری نیند لے گیا جاناں۔

ہاں یہیں ماجرا نہیں ملتا
اور یہیں کا ہے ماجرا جاناں۔

اس پہ اکثر رہا ہوں نازاں میں
میں نے تجھ کو رکھا خفا جاناں

خود کو باہر سے دیکھتے ہوئے میں
اپنے اندر بہت رہا جاناں

تیرے بارے میں کچھ پتہ ہے تو یہ
تجھ کو میرا نہیں پتہ جاناں ۔

جسم سے روح اب نکل گئی ہے
سایہ کو سایہ بھا گیا جاناں ۔

عشق تھا یا ہوس کا جال کوئی
آج ہو جائے فیصلہ جاناں ۔

میں بھی دنیا پرست انساں ہوں
تو بھی مطلب کی فارہہ جاناں۔

اب یہ حالت ہے تیرے عاشق کی
سانس آئی تو مر گیا جاناں

ہاں تمہی پر تو جان دیتا ہوں
تم نے جاناں نہیں سنا جاناں ؟

منحصر ہونے پہ ہی سب ہے اور
میرا ہونا بہیں ہوا جاناں ۔

پھر اک عرش_بریں سے آئی صدا
یہ زمانہ نہیں میرا جاناں ۔

مر گیا اپنی ناتوانی سے
ذات کا رنج رہ گیا جاناں۔

اب کہیں جا کے میں خدا ہوا ہوں
ورنہ برسوں تو خاک تھا جاناں ۔

اب میرا مدعا یہ ہے تجھ سے
پوچھ مت کیا ہے مدعا جاناں

بے سبب تھیں سبھی وہ امیدیں
اپنا ہی انتظار تھا جاناں۔

نارسائی کا یاں سوال نہیں
تو یقین کر میں رو پڑا جاناں

آگیا درمیان اپنے پھر
ہو خدا جیسے اک خلا جاناں ۔

طرز_حمزہ سے یاد پڑتا ہے
تھا کوئی جون ایلیا جاناں

عمران حمزہ
****************

ﺁﺭﺯﻭﮨﮯ ﮐﮧ ﮐﺒﮭﯽ ﺗُﻢ ﮐﻮ ﺳﺠﺎﺅﮞ ﺟﺎﻧﺎﮞ
ﺍَﭘﻨﮯ ﮨﺎﺗﮭﻮﮞ ﺳﮯ ﻣَﯿﮟ ﺩُﻟﮩﻦ ﺑﮭﯽ ﺑﻨﺎﺅﮞ ﺟﺎﻧﺎﮞ

ﺗِﺮﯼ ﺯُﻟﻔﻮﮞ ﮐﻮ ﻣَﯿﮟ ﻃُﻮﻝِ ﺷَﺐِ ﻓُﺮﻗَﺖ ﺩﮮ ﺩﻭﮞ
ﺍﻭﺭ ﭘﮭﺮ ﺍُﻥ ﻣِﯿﮟ ﺳِﺘﺎﺭﮮ ﺑﮭﯽ ﺳﺠﺎﺅﮞ ﺟﺎﻧﺎﮞ

ﺗِﺮﯼ ﺁﻧﮑﮭﻮﮞ ﮐﻮ ﻣَﯿﮟ ﮨﯿﺮﮮ ﺳﮯ ﭼَﻤﮏ ﺑﮭﯽ ﺩﮮ
ﺩﻭﮞ
ﺍُﻥ ﻣِﯿﮟ ﭘﮭﺮ ﺭَﺍﺕ ﮐﺎ ﮐﺎﺟﻞ ﺑﮭﯽ ﻟﮕﺎﺅﮞ ﺟﺎﻧﺎﮞ

ﺗِﺮﮮ ﮨﻮﻧﭩﻮﮞ ﮐﮯ ﮐِﻨﺎﺭﻭﮞ ﮐﻮ ﺣَﻮﺍﺷﯽ ﺩﮮ ﮐﺮ
ﺍُﻥ ﭘﮧ ﻣَﯿﮟ ﻻﻟﮧ ﻭﮔﻞ ﮐﻮ ﺑﮭِﯽ ﻟﮕﺎﺅﮞ ﺟﺎﻧﺎﮞ

ﺗِﺮﮮ ﮔﺎﻟﻮﮞ ﭘﮧ ﺍَﻧﺎﺭﻭﮞ ﮐﯽ ﻣَﯿﮟ ﺳُﺮﺧﯽ ﻣَﻞ ﺩﻭﮞ
ﺗِﺮﮮ ﮐﺎﻧﻮﮞ ﻣِﯿﮟ ﺑﮭﯽ ﮐﻠﯿﻮﮞ ﮐﻮ ﺳﺠﺎﺅﮞ ﺟﺎﻧﺎﮞ

ﺗُﻢ ﮐﻮ ﺧُﻮﺷﺒُﻮ ﮐﮯ ﺣَﻮﺍﻟﮯ ﺳﮯ ﮨﻤﯿﺸﮧ ﺟﺎﻧﻮﮞ
ﺗُﺠﮫ ﮐﻮ ﯾُﻮﮞ ﭘﮭﻮﻝ ﮐﮯ ﮨﺎﻟﮯ ﻣِﯿﮟ ﭼﮭﭙﺎﺅﮞ ﺟﺎﻧﺎﮞ

ﺍَﭘﻨﯽ ﺁﻧﮑﮭﻮﮞ ﮐﻮ ﺑَﻨﺎ ﮐﺮ ﻣَﯿﮟ ﻉﻟﯽ ﻏُﻨﭽﮧٔ ﺩِﻝ
ﺗِﺮﮮ ﺭَﺳﺘﮯ، ﺗِﺮﯼ ﮔﻠﯿﻮﮞ ﻣِﯿﮟ ﺑﭽﮭﺎﺅﮞ ﺟﺎﻧﺎﮞ

نامعلوم
****************
جب سے آیا ہے تیرے پیار کا موسم جاناں
دل میں رہتی ہے لگاتار چھماچھم جاناں

زخم جو تم نے دیے اُن کا سندیسہ یہ ہے
بھیجنا اب نہ خُدا را کوئی مرہم جاناں

جل رہے تھے میری پلکوں پہ جو یادوں کے چراغ
اب تو اُن کی بھی لویں ہو گئیں مدھم جاناں

رک گئی سانس، بچھڑنے کی گھڑی جب آئی
دل مگر پھر بھی دھڑکتا رہا پیہم جاناں

باندھ لوں میں بھی تیری یاد کے گھنگرو، لیکن
رقص کرنا بھی تڑپنے سے نہیں کم جاناں

تو نے چھوڑا نہ کسی ردعمل کے قابل
اب میرا شعر نہ شعلہ ہے نہ شبنم جاناں

جانے کیا تجھ سے ہوئی بات کہ گم صم ہے قتیل
اب تیرا نام بھی لیتا ہے وہ کم کم جاناں

قتیل شفائی
****************
,کہتی تھی رہا نہ جاے پل بھر جاناں
د یکھا وقت کا آنینہ ٹوٹا بھرم جاناں

رہتی ھے مجھ کو بے چینی اس قدر کیو کر

زبا ں تلک نہ آجاے تیرا نام جاناں

لوگ حیراں ھے دیکھ کر ھوا مجھ کو کیا

کیسے کہو کھا گیا تیرا غم جانا ں

تو میرا نہ سہی مگر تیری خوشبو آج بھی

مہکتی ھے میری تنہاھوں میں ھر دم جاناں

ابھی رات باقی پر نید کہا ں یاسر

آو ابھی اور لکھتے ہیں تیرا ستم جاناں

یاسر عباس

****************
یہ چاند تارے فدا ہوں تجھ پر، الٹ دے تُو جو نقاب جاناں
بہار ساری نثار تجھ پر، ہے چیز کیا یہ گلاب جاناں

شمار کرتا ہوں خود کو تجھ پر، تُو زندگی کا حساب جاناں
ہے تُو جوانی، ہے تُو ہی مستی، ہے تُو ہی میرا شباب جاناں

تری محبت کو میرے دل نے سنبھال رکھا ہے خود میں ایسے
کہ جیسے خود میں سنبھال رکھے، کتاب کوئی گلاب جاناں

ہےحرف آغاز تُو ہی جاناں تو حرف آخر بھی تُو ہی اِس کا
ہے تُو ہی تفسیر، تُو خلاصہ، تُو زندگی کی کتاب جاناں

گناہ تیرے لئے ہیں میرے، ترے لئے ہے ہر ایک نیکی
یہ تجھ پہ چھوڑا، جو تیری مرضی، عذاب دے یا ثواب جاناں

کبھی نہ خود کو بکھرنے دینا، کبھی نہ رونا، خیال رکھنا
تم ایک نازک سے دل کی دھڑکن، ہو ایک شاعر کا خواب جاناں

تری وفا کی، ترے یقیں کی قسم ہے مجھ کو ترا رہے گا
جہاں ہو، جس حال میں ہو راجا، ہو خوب یا ہو خراب جاناں

نامعلوم
****************

تُو نے اُس موڑ پہ توڑا ہے تعلق کہ جہاں
دیکھ سکتا نہیں کوئی بھی پلٹ کر جاناں

اب یہ عالم ہے کہ آنکھیں جو کھُلیں گی اپنی
یاد آئے گا تیری دید کا منظر جاناں

مجھ سے مانگے گا تِرے عہدِ محبت کا حساب
تیرے ہِجراں کا دہکتا ہوا محشر جاناں

یوں مِرے دل کے برابر تیرا غم آیا ہے
جیسے شیشے کے مقابل کوئی پتھر جاناں

جیسے مہتاب کو بے انت سمندر چاہے
میں نے اس طَور سے چاہا تجھے اکثر جاناں

محسن نقوی
****************
جس طرح تو نے کیا مجھ سے کنارہ جاناں
اس طرح زیست نے بھی مجھ کو نہ مارا جاناں

ھاں ترے پیار میں کیا کچھ نہ گنوایا میں نے
پورا اب کیسے کروں گا یہ خسارہ جاناں

جب بھی مشکل میں کسی نے نہ دیا ساتھ مرا
میں نے اس وقت بھی تھا تجھ کو پکارا جاناں

کیسی نفرت کی تھی آندھی کہ شجر ٹوٹ گیا
رہ گیا جس پہ لکھا نام ہمارا جاناں

کوئی جو مجھ سے ان اشکوں کا سبب پوچھے گا
میں نہیں لوں گا کبھی نام تمھارا جاناں

میں نے دنیا کی نگاہوں سے بچا رکھا تھا
کھا گئی کس کی نظر پیار ہمارا جاناں

جیسے امید کی کشتی تھی بھنور میں پہنچی
میں نے کس درد سے تھا تجھ کو پکارا جاناں

بعد مرنے کے مجھے کوئی نہیں روئے گا
ہو ہی جائے گا ترا بھی تو گزارہ جاناں

تو نے تو چھوڑ دیا ہے مجھے تنہا کر کے
چار کاندھوں کا ہے درکار سہارا جاناں

رضاسید
****************