Rahi Na-Gufta Mere Dil Me Dastan Meri,Na Is Dayar Me Samjha Koi Zuban Meri

میر تقی میر/سیماب اکبر آبادی/علامہ اقبال/محمد طٰہٰ خان 

************************************

رہی ناگفتہ مرے دل میں داستاں میری
نہ اس دیار میں سمجھا کوئی زباں میری

برنگ صوت جرس تجھ سے دور ہوں تنہا
خبر نہیں ہے تجھے آہ کارواں میری

ترے نہ آج کے آنے میں صبح کے مجھ پاس
ہزار جاے گئی طبع بدگماں میری

وہ نقشِ پائے ہوں میں مٹ گیا ہو جو رہ میں
نہ کچھ خبر ہے ، نہ سدھ ہےگی رہرواں میری

شب اس کے کوچے میں جاتا ہوں اس توقع پر
کہ ایک دوست ہے واں خواب پاسباں میری

اسی سے دور رہا،اصل مدعا جو تھا
گئی یہ عمر عزیز،آہ رائیگاں میری

ترے فراق میں جیسے خیال مفلس کا
گئی ہے فکر پریشان کہاں کہاں میری

نہیں ہے تاب و تواں کی جدائی کا اندوہ
کہ ناتوانی بہت ہے مزاج داں میری

رہا میں در پس دیوار باغ مدت لیک
گئی گلوں کے نہ کانوں تلک فغاں میری

ہوا ہوں گریہ خونیں کا جب سے دامن گیر
نہ آستین ہوئی پاک دوستاں میری

دیا دکھائی مجھے تو اسی کا جلوہ میر
پڑی جہاں میں جا کر نظر جہاں میری

میر تقی میر

***************

جرس ہے کاروان اہل عالم میں فغاں میری
جگا دیتی ہے دنیا کو صدائے الاماں میری

تصور میں وہ کچھ برہم سے ہیں کچھ مہرباں سے ہیں
انہیں شاید سنائی جا رہی ہے داستاں میری

ہر اک ذرہ ہے صحرا اور ہر صحرا ہے اک دنیا
مگر اس وسعت عالم میں گنجائش کہاں میری

مری حیرت پہ وہ تنقید کی تکلیف کرتے ہیں
جنہیں یہ بھی نہیں معلوم نظریں ہیں کہاں میری

مسلسل تھا فریب خواب گاہ عالم فانی
مگر سوتا رہا چلتی رہی عمر رواں میری

وہی لمحہ ورود ناگہاں کا ان کے ہو شاید
جتا کر آئے جب بھی آئے مرگ ناگہاں میری

مذاق ہم زبانی کو نہ ترسوں باغ جنت میں
کوئی سیماب حوروں کو سکھا دیتا زباں میری

سیماب اکبر آبادی
 

**************

نہيں منت کش تاب شنيدن داستاں ميری
خموشی گفتگو ہے بے زبانی ہے زباں ميری

يہ دستور زباں بندی ہے کيسا تيری محفل ميں
يہاں تو بات کرنے کو ترستی ہے زباں ميری

اٹھائے کچھ ورق لالے نے ، کچھ نرگس نے ، کچھ گل نے
چمن ميں ہر طرف بکھری ہوئی ہے داستاں ميری

اڑالی قمريوں نے ، طوطيوں نے ، عندلبوں نے
چمن والوں نے مل کر لوٹ لی طرز فغاں ميری

ٹپک اے شمع آنسو بن کے پروانے کی آنکھوں سے
سراپا درد ہوں حسرت بھری ہے داستاں ميری

الہی! پھر مزا کيا ہے يہاں دنيا ميں رہنے کا
حيات جاوداں ميری ، نہ مرگ ناگہاں ميری

مرا رونا نہيں ، رونا ہے يہ سارے گلستاں کا
وہ گل ہوں ميں ، خزاں ہر گل کی ہے گويا خزاں ميری

حضرت علامہ محمد اقبال
 

******************

لڑی اس ٹھاٹ سے منکوحۂ کافر بیاں میری
فرشتے لکھتے لکھتے چھوڑ بھاگے داستاں میری

محلے بھر کی دیواروں پہ سر ہی سر نظر آئے
مرے بچوں نے جس دم لوٹ لی طرز فغاں میری

عجب کچھ لطف رکھتا ہے جو کہتے ہیں میاں بیوی
کہ شادی ہو گئی لیکن کہاں تیری کہاں میری

مسلماں ہوں مگر یہ سوچ کر مرنے سے ڈرتا ہوں
نہ جانے کس کے گھر جائے بلائے ناگہاں میری

وہی ہے اختلاف باہمی کی انجمن اب تو
فقط شادی کے دن اس نے ملائی ہاں میں ہاں میری

بہت شائستۂ انداز گفتن ہے زباں اس کی
نہیں منت کش تاب شنیدن داستاں میری

محمد طٰہٰ خان