Radeef Ay Saqi ,Radeef Hai Saqi

ردیف............ اے ساقی

لا پھر اک بار وہی بادہ و جام اے ساقی
ہاتھ آ جائے مجھے میرا مقام اے ساقی

تین سو سال سے ہیں ہند کے میخانے بند
اب مناسب ہے تیرا فیض ہو عام اے ساقی

مری مینائے غزل میں تھی ذرا سی باقی
شیخ کہتا ہے کہ ہے یہ بھی حرام اے ساقی

شیر مردوں سے ہوا پیشہ تحقیق تہی
رہ گئے صوفی و ملا کے غلام اے ساقی

عشق کی تیغ جگردار اڑا لی کس نے
علم کے ہاتھ میں خالی ہے نیام اے ساقی

سینہ روشن ہو تو ہے سوز سخن عین حیات
ہو نہ روشن، تو سخن مرگ دوام اے ساقی

تو مری رات کو مہتاب سے محروم نہ رکھ
تیرے پیمانے میں ہے ماہ تمام اے ساقی

علامہ اقبال
************

یہ نم فضا, یہ گھٹائیں ,یہ شام اے ساقی
بہ شرطِ ہوش پھر ایک دورِ جام اے ساقی

میں لاکھ تشنہ لبِ تشنہ کام اے ساقی
سوال پھر بھی ہے مجھ پہ حرام اے ساقی

پھر ایک جلوہ بصد اہتمام اے ساقی
نظر باپردہ ہے عالم تمام اے ساقی

جو التفات کی اک شکل ہے تغافل بھی
تو التفات کو میرا سلام اے ساقی

یہ جام مَے , یہ تبسم, یہ چشمِ کیف آگیں
فریب , اور بہ ایں اہتمام اے ساقی

نامعلوم
************
ردیف ............ ہے ساقی

سبو اٹھا کہ فضا سیم خام ہے ساقی
فراز کوہ پہ ماہ تمام ہے ساقی

چنے ہوئے ہیں پیالے جھکی ہوئی بوتل
نیا قعود نرالا قیام ہے ساقی

بہ ناز مغچگان و بہ فیض نعرۂ ہو
ہمائے ارض و سما زیر دام ہے ساقی

فضا پہ نہر پرافشان تاب حور و طہور
غنا میں شہر قصور و خیام ہے ساقی

یہ کون شاہد مستی فروش و نغمہ نواز
نفس کے تار پہ گرم خرام ہے ساقی

نہ اسم و جسم نہ حرف و نفس نہ سایہ و نقل
یہ کیا طلسم یہ کیسا مقام ہے ساقی

رکے نہ دور کہ اب تک بہ زیر چرخ کبود
ریا حلال ہے صہبا حرام ہے ساقی

بنام آدم و حوا پلا کہ گرم سرود
نسیم روضۂ دارالسلام ہے ساقی

سبوئے قلعہ شکن کی سپر عنایت کر
کہ تیغ دور زماں بے نیام ہے ساقی

اگر غذائے خیال و نظر سے ہے محروم
حیات ذہن کا ماہ صیام ہے ساقی

تمام دولت دنیا و دیں پہ بھاری ہے
وہ دل جو بستۂ حب انام ہے ساقی

عجب نہیں کہ تجھے بھی پسند آئے یہ قول
جھکے نہ دل تو عبادت حرام ہے ساقی

صفات و ذات کے ایوان روح پرور تک
سبو سے فاصلۂ نیم گام ہے ساقی

جوش ملیح آبادی
************

تیری نظروں کا فسوں، دشمنِ دیں ہے ساقی
ورنہ پینے میں کوئی بات نہیں ہے ساقی

جو ترے جام سے سرشار نہیں ہے ساقی
وہ بشر کون سی بستی کا مکیں ہے ساقی

اس مئے ناب سے کیا فائدہ، جب ساغر میں
جلوہ افروز تری چینِ جبیں ہے ساقی

ابھی باقی ہے الَم ہائے فراواں کا خمار
ابھی ہلکی سی کسک دل کے قریں ہے ساقی

نظر اٹھتی ہی نہیں ہے ترے میخانے سے
ورنہ دنیا کی ہر اِک چیز حسیں ہے ساقی

بچ کے جائیں گے کہاں عالمِ بالا کے مکیں
آسماں بھی ترے کوچے کی زمیں ہے ساقی

آنکھ نے کھائے ہیں سو بار نظر کے دھوکے
دل بدستور محبت کا امیں ہے ساقی

فقط آنسو ہی نہیں حسنِ وفا کا زیور
یہ تبسّم بھی محبت کا نگیں ہے ساقی

نامعلوم
************

ہلکا ہلکا سرور ہے ساقی
بات کوئی ضرور ہے ساقی

تیری آنکھوں کو کر دیا سجدہ
میرا پہلا قصور ہے ساقی

تیرے رخ پر ہے یہ پریشانی
اک اندھیرے میں نور ہے ساقی

تیری آنکھیں کسی کو کیا دیں گی
اپنا اپنا سرور ہے ساقی

پینے والوں کو بھی نہیں معلوم
مے کدہ کتنی دور ہے ساقی

عبدالحمید عدم
************

ﺩﮔﺮﮔﻮﮞ ﮨﮯﺟﮩﺎﮞ ، ﺗﺎﺭﻭﮞ ﮐﯽ ﮔﺮﺩﺵ ﺗﯿﺰ ﮨﮯﺳﺎﻗﯽ
ﺩﻝ ﮨﺮ ﺫﺭﮦ ﻣﯿﮟ ﻏﻮﻏﺎﺋﮯ ﺭﺳﺘﺎ ﺧﯿﺰ ﮨﮯ ﺳﺎﻗﯽ

ﻣﺘﺎﻉ ﺩﯾﻦ ﻭ ﺩﺍﻧﺶ ﻟﭧ ﮔﺌﯽ ﺍﻟﻠﮧ ﻭﺍﻟﻮﮞ ﮐﯽ
ﯾﮧ ﮐﺲ ﮐﺎﻓﺮ ﺍﺩﺍ ﮐﺎ ﻏﻤﺰۂ ﺧﻮﮞ ﺭﯾﺰ ﮨﮯ ﺳﺎﻗﯽ

ﻭﮨﯽ ﺩﯾﺮﯾﻨﮧ ﺑﯿﻤﺎﺭﯼ ، ﻭﮨﯽ ﻧﺎ ﻣﺤﮑﻤﯽ ﺩﻝ ﮐﯽ
ﻋﻼﺝ ﺍﺱ ﮐﺎ ﻭﮨﯽ ﺁﺏ ﻧﺸﺎﻁ ﺍﻧﮕﯿﺰ ﮨﮯ ﺳﺎﻗﯽ

ﺣﺮﻡ ﮐﮯ ﺩﻝ ﻣﯿﮟ ﺳﻮﺯ ﺁﺭﺯﻭ ﭘﯿﺪﺍ ﻧﮩﯿﮟ ﮨﻮﺗﺎ
ﮐﮧ ﭘﯿﺪﺍﺋﯽ ﺗﺮﯼ ﺍﺏ ﺗﮏ ﺣﺠﺎﺏ ﺁﻣﯿﺰ ﮨﮯ ﺳﺎﻗﯽ

ﻧﮧ ﺍﭨﮭﺎ ﭘﮭﺮ ﮐﻮﺋﯽ ﺭﻭﻣﯽ ﻋﺠﻢ ﮐﮯ ﻻﻟﮧ ﺯﺍﺭﻭﮞ ﺳﮯ
ﻭﮨﯽ ﺁﺏ ﻭ ﮔﻞ ﺍﯾﺮﺍﮞ ، ﻭﮨﯽ ﺗﺒﺮﯾﺰ ﮨﮯ ﺳﺎﻗﯽ

ﻓﻘﯿﺮ ﺭﺍﮦ ﮐﻮ ﺑﺨﺸﮯ ﮔﺌﮯ ﺍﺳﺮﺍﺭ ﺳﻠﻄﺎﻧﯽ
ﺑﮩﺎ ﻣﯿﺮﯼ ﻧﻮﺍ ﮐﯽ ﺩﻭﻟﺖ ﭘﺮﻭﯾﺰ ﮨﮯ ﺳﺎﻗﯽ

ﻧﮩﯿﮟ ﮨﮯ ﻧﺎﺍﻣﯿﺪ ﺍﻗﺒﺎﻝ ﺍﭘﻨﯽ ﮐﺸﺖ ﻭﯾﺮﺍﮞ ﺳﮯ
ﺫﺭﺍ ﻧﻢ ﮨﻮ ﺗﻮ ﯾﮧ ﻣﭩﯽ ﺑﮩﺖ ﺯﺭﺧﯿﺰ ﮨﮯ ﺳﺎﻗﯽ

علامہ اقبال
************

عقائد وہم ہیں مذہب خیالِ خام ہے ساقی
ازل سے ذہنِ انساں بستہءِ اوہام ہے ساقی

حقیقت آشنائی اصل میں گُم کردہ راہی ہے
عروسِ آگہی پردہءِ اِبہام ہے ساقی

مُبارک ہو ضعیفی کو خِرَد کا فلسفہ رانی
جوانی بے نیاز عبرتِ انجام ہے ساقی

ہوَس ہو گی اسیرِ حلقہءِ نیک و بد عالم
محبت ماورائے فکرِ ننگ و نام ہے ساقی

ابھی تک راستے کے پیچ و خم سے دِل دھڑکتا ہے
مِرا ذوقِ طلب شاید ابھی تک خام ہے ساقی

وہاں بھیجا گیا ہوں چاک کرنے پردہءِ شب کو
جہاں ہر صُبح کے دامن پہ عکسِ شام ہے ساقی

مِرے ساغر میں مے ہے اور تِرے ہاتھوں میں بربط ہے
وطن کی سرزمیں میں بُھوک سے کُہرام ہے ساقی

زمانہ برسرِ پیکار ہے پُرہول شُعلوں سے
تِرے لب پر ابھی تک نغمہءِ خیام ہے ساقی

ساحِر لُدھیانوی