Aaj Itna Jalao Keh Pighal Jae Mera Jisam Shayed Issi Sorat Hi Sukoon Paae Mera Jisam

آج اتنا جلاؤ کہ پگھل جائے مِرا جسم
شاید اسی صورت ہی سکوں پائے مِرا جسم

آغوش میں لے کر مجھے اس زور سے بھینچو
شیشے کی طرح چَھن سے چٹخ جائے مِرا جسم

یا دعوائے مہتابِ تجلّی نہ کرے وہ
یا نُور کی کرنوں سے وہ نہلائے مِرا جسم

کسی شہرِ طلسمات میں لے آیا تخیّل
جس سمت نظر جائے نظر آئے مِرا جسم

آئینے کی صورت میں مری ذات کے دو رُخ
جاں محوِ فُغاں ہے تو غزل گائے مِرا جسم

تنویر پڑھو اسم کوئی ردِ بلا کا
گھیرے میں لئے بیٹھے ہیں کچھ سائے مِرا جسم

تنویر سپرا