Adhori Aurat Mere Andar Ki Tanhaai Tumhein Mahsoos Kar Ke Aur Barh Jati Hai

 ادھوری عورت

‎مرے اندر کی تنہائی
‎تمہیں محسوس کرکے اور بڑھتی ہے
‎اندھیروں کی شناسائی
‎خراجِ جان لینے کو
‎مجھے احساس دینے کو
‎ہر اک لحظہ لپکتی ہے
‎میں اکثر رات کو اٹھ کر
‎اندھیرے آسمانوں میں
‎سحر ہونے سے کچھ پہلے
‎تمہیں پہچان لیتی ہوں
‎تمہاری گہری آنکھوں کو
‎سلگتے لمس لمحوں کو
‎فسردہ دلنشیں انجام کو
‎میں جان لیتی ہوں
‎میں آگاہی کی اس منزل سے
‎رستہ مڑ نہیں سکتی
‎کہ اس کے بعد ہی
‎وہ درد کی رنگین منزل ہے
‎وہی اک بوجھ ہے جو صرف
‎مجھ کو ہی اٹھانا ہے
‎خود اپنے آپ کو کاندھے پہ لے کر
‎دور جانا ہے
‎اگر میں پوچھ لوں تم سے
‎کہ تنہا اس سفر میں
‎کون میرا ہم سفر ہوگا؟؟

‎شائستہ مفتی