Aap Iss Tarah To Hosh Udaya Na Kijiye Yun Ban Sanwar Ke Saamny Aaya Na Kijiye

آپ اِس طرح تو ہوش اُڑایا نہ کیجیے

یُوں بن سنور کے سامنے آیا نہ کیجیے

یا سر پہ آدمی کو بِٹھایا نہ کیجیے

یا پھر نظر سے اُس کو گِرایا نہ کیجیے

یُوں مَد بھری نِگاہ اُٹھایا نہ کیجیے

پینا حرام ہے تو پلایا نہ کیجیے

کہیے تو آپ محو ہیں کس خیال میں

ہم سے تو دِل کی بات چُھپایا نہ کیجیے

تیغِ سِتم سے کام جو لینا تھا لے چُکے

اہلِ وفا کا یُوں تو صفایا نہ کیجیے

مَیں آپ کا، گھر آپ کا، آئیں ہزار بار

لیکن کسی کی بات میں آیا نہ کیجیے

اُٹھ جائیں گے ہم آپ کی محفل سے آپ ہی

دُشمن کے رُوبرو تو بِٹھایا نہ کیجیے

دِل دور ہوں تو ہاتھ مِلانے سے فائدہ؟

رسمًا کسی سے ہاتھ مِلایا نہ کیجیے

محروم ہوں لِطافتِ فطرت سے جو نصیر

اُن بےحسوں کو شعر سُنایا نہ کیجیے

پیر نصیر الدین نصیر