زیرِ سجدہ روۓ جانانہ نظر آتا ہے
سوۓ محراب صنم خانہ نظر آتا ہے
شمع یہ کیسی جلائی ہے ازل میں تو نے
ہر ستارہ تیرا پروانہ نظر آتا ہے
اپنی جھولی میں لیے پھرتا ہے اسرار کیٔ
جو بظاہر تمہیں دیوانہ نظر آتا ہے
اشکِ غمّاز ہے یہ قطرہء خوں ناب نہیں
آنکھوں سے چھلکا جو پیمانہ نظر آتا ہے
زندگی جس کی محبت میں لٹا دی ہم نے
آج وہ شخص ہی بیگانہ نظر آتا ہے
اک جھلک دیکھا تھا اس رشکِ بتاں کو ارشد
دل اسی دن سے پری خانہ نظر آتا ہے
مرزا ارشد علی بیگ
آڈبان، پینسلوانیا
No comments:
Post a Comment