جواب دیتے ھُوئے اک سوال کا دُکھ ھے
مِرے نصیب میں یارو کمال کا دُکھ ھے
جھجھک جھجھک کے مِرے گر رھے ہیں جو آنسو
سنو! یہ اب کا نہیں یہ پچھلے سال کا دُکھ ھے
امیرِ شہر کے ڈیرے پہ معصوم ناچنے والی
غریب لڑکی کے حسن و جمال کا دُکھ ھے
گلے میں ھار سجائے منا رھے ہیں خوشی
جنہیں کلائی پہ بندھے رومال کا دُکھ ھے
شریک ھونا نہ ھونا الگ کہانی ھے
تمہارے ھاتھ میں مہندی کے تھال کا دُکھ ھے
سُپردِ خاک کئیے اپنے ھاتھ سے کئی لوگ
جو بھوک سے ھُوا اس انتقال کا دُکھ ھے
No comments:
Post a Comment