رنگ باتیں کریں اور باتوں سے خوشبو آئے
زخم پھولوں کی طرح مہکے اگر تو آئے
بھیگ جاتی ہیں اِس اُمید پر آنکھیں ہر رات
شاید اِس رات وہ مہتاب لب جؤ آئے
ہم تِری یاد سے کترا کے گزر جاتے مگر
راہوں میں پھولوں کے لب سایوں کے گیسو آئے
وہی لب تشنگی اپنی وہی ترغیب سراب
دستِ معلوم کی ہم آخری حد چھو آئے
سینے ویران ہوئے انجمن آباد رہی
کتنے گل چہرہ گئے کتنے پری رو آئے
آزمائش کی گھڑی سے گزر آئے تو ضیا
جشنِ غم جاری ہوا آنکھ سے آنسو آئے
ضیاء جالندھری
No comments:
Post a Comment