Aj Akhan Waris Shah Nu Kethon Qabran Wichon Bol

 

اج آکھاں وارث شاہ نوں کِتھوں قبراں وچوں بول
تے اَج کتابِ عشق دا کوئی اگلا ورقہ پھَول
اِک رَوئی سی دھی پنجاب دی توں لِکھ لِکھ مارے وین
اج لَکھاں دھیاں روندیاں تینوں وارث شاہ نوں کَہین
وے درد منداں دے دردِیا اُٹھ تَک اپنا پنجاب
اج بیلے لاشاں وِچھیاں تے لہو دی بھری چناب
کِسے نے پنجاں پانیاں وِچ  دِتی زہر رلا
تے اونہاں پانیاں دھرت نوں دِتا پانی لا
اس زرخیز زمین دے لُوں لُوں پھُٹیا زہر
گِٹھ گِٹھ چڑہیاں لالیاں فُٹ فُٹ چَڑہیا قہر
اج آکھاں وارث شاہ نوں کِتھوں قبراں وچوں بول
تے اَج کتابِ عشق دا کوئی اگلا ورقہ پھَول
وے اَوہ اُلی سی وا فیر وَن وَن ہو گئی جا
اوہنیں ہر اک وانس دی ونجھنی دِتی ناگ بنا
پہلا ڈنگ مداریاں منتر گئے گنواچ
دوجے ڈنگ دی لگ گئی جنڑے کھنڑے نو لاگ
لاگاں کِیلے لوک منہ بس فیر ڈَنگ ہی ڈَنگ
پلو پلی پنجاب دے نیلے پے گئے اَنگ
اج آکھاں وارث شاہ نوں کِتھوں قبراں وچوں بول
تے اَج کتابِ عشق دا کوئی اگلا ورقہ پھَول
گَلیَوں ٹُٹے گیت فیر ترَکڑیَوں ٹُٹی تند
تنرَنجنوں ٹُٹیاں سہیلیاں چرکھڑے کُو کَر بند
سنے سیج دے بیڑیاں لُڈن دتیاں روہڑ
سنے ڈالیاں پِینگ اج پِپلاں دتی توڑ
اج آکھاں وارث شاہ نوں کِتھوں قبراں وچوں بول
تے اَج کتابِ عشق دا کوئی اگلا ورقہ پھَول
جتھے وَجدی سی پھُوک پیار دی اوہ ونجھنی گئی گنواچ
رانجھے دے سب وِیر اَج بھُل گئے اوہدی جاچ
دھرتی تے لہو وَسیا قبراں پَئیاں چَون
پریت دیاں شہزادیاں اَج وِچ مزاراں رون
اَج سَبھے قیدو بن گئے حُسن عشق دے چور
اَج کِتھوں لے آئیے لبھ کے وارث شاہ اِک ہور
اج آکھاں وارث شاہ نوں کِتھوں قبراں وچوں بول
تے اَج کتابِ عشق دا کوئی اگلا ورقہ پھَول
اَمرِتا پریتم