کتاب عشق کے اُلٹے ورق اول سے آخر تک
مگر سمجھے نہ ہم اس کا سبق اول سے آخر تک
بری ہے ابتدا بھی انتہا بھی تیری الفت کی
کہ اس میں ہیں غم و رنج و قلق اول سے آخر تک
کبھی عرش اعلیٰ پر کبھی ہے تخت الژیٰ میں ہے
کھلے ہیں شیخ پر چودہ طبق اول سے آخر تک
مے انگور تحفے میں تجھے دیتا ہوں اے زاہد
رہے گا تیز یکساں یہ عرق اول سے آخر تک
ہزاروں دوست دشمن بزم میں اس کی رہے لیکن
رہا اک شکل پر نظم و نسق اول سے آخر تک
ازل سے تا ابد پائی نہ راحت اس جراحت نے
رہا ہم بسملوں کا سینہ شق اول سے آخر تک
بہار عارض گلگلوں سے تیرے اس کو کیا نسبت
نہیں اک رنگ پر رہتی شفق اول سے آخر تک
بشر کو گر نہ ملتی کس کو ملتی عشق کی دولت
نہیں تھا کوئی اس کا مستحق اول سے آخر تک
لکھوں اُس کو جواب اے داغؔ کیا میں سخت حیران ہوں
لکھے ہیں خط میں مضمون ادق اول سے آخر تک
داغؔ دہلویؒ
No comments:
Post a Comment