Khumar Aks Unhein Dhanpna Nahi Aata Woh Jinko Aainay Mein Jhankna Nahi Aata

غزل
خُمارِ عکس اُنہیں ڈھانپنا نہیں آتا 

وہ جن کو آئینے میں جھانکنا نہیں آتا

ہمارے خون میں جرأت ہے دل میں ہمّت ہے

کسی کے ڈرسے ہمیں کانپنا نہیں آتا

محبتوں نے محبت مزاج کر ڈالا

محبتوں میں ہمیں ڈانٹنا نہیں آتا

ہمیں بہ شوق قدامت پسند کہہ لو تُم

تُمہارا پیار ہمیں بانٹنا نہیں آتا

وہ اس لیے بھی برتتا ہے بے رُخی مجھ سے

اُسے خبر ہے مجھے مانگنا نہیں آتا

ہم اپنی جھیل میں ہیں اور اپنی موج میں ہیں

کسی کنویں میں ہمیں جھانکنا نہیں آتا

اُتار لیتے ہیں ہم وَرْدؔ شاخ سے لیکن

تمہاری زلفوں میں بس ٹانکنا نہیں آتا 

وَرْدؔ بزمی