Tamam Raat Mere Ghar Ka Aik Dar Khula Raha Main Raah Dekhti Rahi Woh Rasta Badal Gaya

تمام رات میرے گھر کا ایک در کھُلا رہا

میں راہ دیکھتی رہی وہ راستہ بدل گیا

 Tamam Raat Mere Ghar Ka Aik Dar Khula Raha

Main Raah Dekhti Rahi Woh Rasta Badal Gaya

وہ شہر ہے کہ جادوگرنیوں کا کوئی دیس ہے
 وہاں تو جو گیا، کبھی بھی لوٹ کر نہ آ سکا
میں وجہِ ترکِ دوستی کو سُن کر مُسکرائی تو
 وہ چونک اُٹھا۔عجب نظر سے مجھ کو دیکھنے لگا
بچھڑ کے مُجھ سے، خلق کو عزیز ہو گیا ہے تُو
 مجھے تو جو کوئی ملا، تجھی کو پُوچھتا رہا
وہ دلنواز لمحے بھی گئی رُتوں میں آئے۔ جب
 میں خواب دیکھتی رہی، وہ مجھ کو دیکھتا رہا
وہ جس کی ایک پل کی بے رُخی بھی دل کو بار تھی
 اُسے خود اپنے ہاتھ سے لکھا ہے۔مجھ کو بھُول جا
دمک رہا ہے ایک چاند سا جبیں پہ اب تلک
گریز پا محبتوں کا کوئی پل ٹھہر گیا 

پروین شاکر

Parveen Shakir