Andmaly Mein Ye Ihsaas e Zian Tha Pehle Zakham Tou Ba'ad Mein Aaya Hai Nishan Tha Pehle

اندمالی   میں   یہ  احساسِ  زیاں  تھا  پہلے
زخم  تو   بعد  میں  آیا  ہے   نشاں  تھا  پہلے
پٹڑیاں بعد میں وحشت کی علامت بنی ہیں
خودکشی کرنے کو گاؤں میں کنواں تھا پہلے
دل  میں  رہنے  کے  بھی  آداب  ہوا کرتے ہیں
تجھ  کو  معلوم  نہیں  کون  یہاں  تھا  پہلے
لا مکاں   لا   کے   اضافے   سے  بنایا  گیا  ہے
اک  مکیں   اور   فقط  ایک  مکاں  تھا  پہلے
ایک سگریٹ تھا مرے ہاتھ میں ایسے کہ قلم
یعنی  جو  شعر  ہوا  ہے  وہ  دھواں تھا  پہلے
فیضان ہاشمی