Roz Daikha Hai Shafaq Se Woh Pighalta Sona Roz Socha Hai Keh Tum Mere Ho Mere Ho Na

روز دیکھا ہے شفق سے وہ پگھلتا سونا
روز سوچا ہے کہ تم میرے ہو میرے ہو نا
میں تو اک کانچ کے دریا میں بہی جاتی ہوں
کھنکھاتے ہوئے ہم راز مجھے سن لو نا
میں نے کانوں میں پہن لی ہے تمہاری آواز
اب مرے واسطے بیکار ہیں چاندی سونا
میری خاموشی کو چپکے سے سجا دو آ کر
اک غزل تم بھی مرے نام کبھی لکھو نا
روح میں گیت اتر جاتے ہیں جیسے خوشبو
گنگناتی سی کوئی شام مجھے بھیجو نا
چاندنی اوس کے قطروں میں سمٹ جائے گی
تیرگی صبح سویرے میں کہیں کھو دو نا
پھر سے آنکھوں میں کوئی رنگ سجا لوں نیناںؔ
کب سے خوابوں کو یہاں بھول گئی تھی بونا
فرزانہ نیناں