حیرتوں کے سلسلے سوز نہاں تک آ گئے
ہم نظر تک چاہتے تھے، تم تو جاں تک آ گئے
ان کی پلکوں پر ستارے، اپنے ہونٹوں پہ ہنسی
قصۂ غم کہتے کہتے ہم کہاں تک آ گئے
زلف میں خوشبو نہ تھی یا رنگ عارض میں نہ تھا
آپ کس کی آرزو میں گلستاں تک آ گئے
رفتہ رفتہ رنگ لایا جذبۂ خاموش عشق
وہ تغافل کرتے کرتے امتحاں تک آ گئے
خود تمہیں چاک گریباں کا شعور آ جائے گا
تم وہاں تک آ تو جاؤ ہم جہاں تک آ گئے
آج قابلؔ میکدے میں انقلاب آنے کو ہے
اہل دل اندیشۂ سود و زیاں تک آ گئے
قابلؔ اجمیری
No comments:
Post a Comment