Koi Poochay Na Hum Se Kia Hoa Dil Hoa Kia Lut Gaya Dil Mit Gaya Dil

کوئی پوچھے نہ ہم سے کیا ہوا دل

ہوا کیا لٹ گیا دل مٹ گیا دل
یہ کہہ کر دے دیا مجھ کو مرا دل
ہمیں کوسے گا دے گا بد دعا دل
مزا دے جائے گی مجھ کو تری آنکھ
مزا دے جائے گا تجھ کو مرا دل
چمن میں جو کھلا گل میں یہ سمجھا
کہ ہے میرا یہ مرجھایا ہوا دل
اٹھے گا لطف صحبت کا ابھی تو
نئے تم ہو نئے ہم ہیں نیا دل
قیامت ہے تمہاری چلبلی شکل
قیامت ہے ہمارا چلبلا دل
کہیں کیا کس نے لوٹا کس کو لوٹا
لٹے ہم تم لٹا جوبن لٹا دل
کوئی اب مفت بھی خواہاں نہیں ہے
ریاضؔ ایسا گیا گزرا ہوا دل
ریاضؔ خیر آبادی