Raat Bhi Kia Kamal Karti Hai Dard Thehre Bahal Karti Hai

رات بھی کیا کمال کرتی ہے
درد ٹھہرے بحال کرتی ہے

ہجر میں دن گزر ہی جاتا ہے
رات جینا محال کرتی ہے

آنکھ بہتی ہے تو نہیں رکتی
دیکھ کتنا ملال کرتی ہے

اور تو کچھ گلہ نہیں تجھ سے
یاد تیری نڈھال کرتی ہے

اوڑھ کر شال پھر اداسی کی
شام مجھ میں دھمال کرتی ہے

کیا کہوں، اک ذرا سی رنجش کیوں
قربتیں پائمال کرتی ہے

روبرو یار ہو پلک جھپکے
آنکھ کب یہ مجال کرتی ہے

روند ڈالا مجھے بتا کیونکر
زیست مجھ سے سوال کرتی ہے

شاعری روگ تو ہے پر صحرا
شخص کو لازوال کرتی ہے
ساحرہ نقوی صحرا