یاد آتی ہے تو پلکوں کو بِھگو جاتی ہے
ہاں محبّت نہیں کی جاتی یہ ہو جاتی ہے
شب ہے تنہائی کی یا گوشۂ فُرقت کا سُکوت
موت آتی ہے مرے پہلو میں سو جاتی ہے
کِتنی ظالم ہے بَلا مغربی سرمایہ کی
خُون کی فصل مری دھرتی پہ بو جاتی ہے
ایک مدّت ہوئی بُھولا نہیں اُسکا چہرہ
ایک تمثیل کہیں دُھند میں کھو جاتی ہے
پیار کی پہلی نظر پڑتی ہے دل پر ارشد
عُمر بھر کے لیے اک پھانس چُبھو جاتی ہے
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania
دل کی ہر آرزو سُلا دینا
ہو سکے تو مُجھے بُھلا دینا
یاد آ جاۓ گر کبھی میری
ایک لمحے کو مُسکرا دینا
باتیں چاہت کی راز ہی رکھنا
ہر کسی کو نہیں سُنا دینا
شورِ محشر تُجھے قسم اُنکی
سو رہا ہوں مجھے اُٹھا دینا
لوگ کرتے ہیں دُشمنی ارشد
کام اپنا ہے بس دُعا دینا
مرزا ارشد علی بیگ
Mirza Arshad Ali Baig
آڈبان پینسلوانیا
Audubon Pennsylvania
No comments:
Post a Comment