Ujad Gaya Hai Tou Kia Shehar e Man Karo Wapas Yeh Meri Dharti Hai Mera Watan Karo Wapas

اُجڑ گیا ہے تو کیا شہرِ من  کرو واپس
یہ میری دھرتی ہے ، میرا وطن کرو واپس
یہ شہر ، گلیاں ، یہ دریا ، یہ بن  ہمارے ہیں
  ہمارے صحراء و کوہ و دمن کرو واپس
    تمہارا ہوتا تو تم سینچتے محبت سے
  خدا کے واسطے میرا چمن کرو واپس
   جو کاٹ کاٹ کے تم بیچتے رہے ہو ، نہ دو
   مگر جو باقی ہیں  سرو و سمن کرو واپس
  نٸے خریدنا مشکل ہیں اب ہمارے لیے
   جو تم نے چوری کیے ہیں کفن کرو واپس
  پکارنا ہے خدا کو ہمیں مدد کے لیے
ہمارے ہونٹ ، زبانیں ، دہَن کرو واپس
  ہماری روحیں ہیں ان میں ہماری سانسیں ہیں
 کٹے پھٹے سہی لیکن بدن کرو واپس
فرحت عباس شاہ