Be-Raham Ko Hoti Hai Jafaoun Se Muhabbat Hum Hijar Zada Dil Ko Wabaoun Se Muhabbat

بے رحم کو ہوتی ہے جفاؤں سے محبت
ہم ہجر زدہ دل کو وباؤں سے محبت

ہاں عشق کے زخموں پہ خزائیں نہیں آتیں
ہے درد کے ماروں کو سزاؤں سے محبت

ہم سادہ مزاجوں کو تکلف نہیں آتا
اور ان کو بہت شوخ اداؤں سے محبت

بالکل بھی نہ سمجھیں گے پجاری یہ ہوس کے
ہوتی ہے حیا کو جو رداؤں سے محبت

جو لوگ تری قید میں رہتے ہوں سدا مست
ہو کیوں انہیں آزاد فضاؤں سے محبت

سینے میں رکھا دل جو سسکتا ہے مسلسل
تھی اس کو بہت پہلے صداؤں سے محبت

ہے تجھ سے کرن کو بھی کچھ ایسی ہی محبت
جیسے کسی پنچھی کو ہواؤں سے محبت
اسماء کِرن
Asma Kiran