Humain Kushgan Hayat Se Hein Junoon Ishq Ki Azmatein Kabhi Hans Pade Teh Tegh Hum , Kabhi Jhoom Uthay Sar e Dar Hum

ہمیں کشتگان حیات سے ہیں جنون عشق کی عظمتیں
کبھی ہنس پڑے تہہ تیغ ہم، کبھی جھوم اٹھے سر دار ہم

رہے مضطرب کبھی مدتوں غم دہر کی کڑی دھوپ میں
جو سکوں ملا ہے تو سو لیئے کبھی زیر گیسوئے یار ہم

تجھے پا سکیں یا نہ پا سکیں، کوئی زندگی کی لگن تو ہے
کہ خوشی سے کیسے اجاڑ دیں تیری آرزو کا دیار ہم

غم زندگی سے شکست کیا رہ آرزو میں قدم بڑھا
تو جو ساتھ ہو تو بدل بھی دیں یہ مزاج لیل و نہار ہم

کبھی پاس آ کے نگاہ کر ہے یہ زندگی تیرا آئینہ
تیرا روپ ہم، تیرا پیار ہم، تیری آرزو کا سنگھار ہم
پیام فتحپوری
Piam Fateh Puri