In Ras Bhari Aankhon Mein Haya Khel Rahi Hai Do Zehar Ke Piyalon Peh Qaza Khel Rahi Hai

ان رس بھری آنکھوں میں حیا کھیل رہی ہے
دو زہر کے پیالوں پہ قضا کھیل رہی ہے

ہیں نرگس و گل کس لیے مسحور تماشہ
گلشن میں کوئی شوخ ادا کھیل رہی ہے

اس بزم میں جائیں تو یہ کہتی ہیں ادائیں
کیوں آئے ہو، کیا سر پہ قضا کھیل رہی ہے

اس چشم سیہ مست پہ گیسو ہیں پریشاں
میخانے پہ _ گھنگھور گھٹا کھیل رہی ہے

بد مستی میں تم نے انہیں کیا کہہ دیا اختر
کیوں شوخ نگاہوں میں حیا کھیل رہی ہے
اختر شیرانی

Akhtar Sherani