Kabhi Tujh Ko Yahan Andesha e Jan Tha Pehle? Yeh Mera Dil Tou Teri Jaye Amaan Tha Pehle

کبھی تجھ کو یہاں اندیشۂ جاں تھا پہلے؟
یہ مرا دل تو تری جائے اماں تھا پہلے

ایسا لگتا ہے، چڑھا اس پہ ترے عشق کا رنگ
دل کو جس رنگ میں دیکھا ہے، کہاں تھا پہلے

ہے کرم تیرا، مری ذات کی تصدیق ہوئی
مرا ہونا تو فقط وہم و گماں تھا پہلے

عشقِ سوزاں کی ہوئی خاص عنایت مجھ پر
ہے جہاں خاک مرا حجرہ وہاں تھا پہلے

کائناتیں جہاں اب وجد میں آئی ہوئی ہیں
ایک مجذوب یہاں رقص کناں تھا پہلے

ہے جہاں تیرہ شبی ٹھہری ترے جانے سے
کتنا پر نور مرا قریۂ جاں تھا پہلے

یہ جو لکنت ہے زباں میں، ہے ترا رعبِ جمال
یہ مرا عجزِ بیاں زورِ بیاں تھا پہلے

اب تو وہ نام بھی لیتے ہوئے لب جلتے ہیں
ہائے جو نام سدا وردِ زباں تھا پہلے

کیا غضب یاد بھی آتی نہیں اس کی نسریںؔ
وہ جو رگ رگ میں لہو بن کے رواں تھا پہلے
نسرین سید
Nasreen Syed