Kijiye Jo Sitam Reh Gaye Hein Jan Dainy Ko Hum Reh Gaye Hein

 

کیجیے جو ستم رہ گئے ہیں
جان دینے کو ہم رہ گئے ہیں

بانٹ لِیں سب نے آپس میں‌خوشیاں
میرے حصّے میں غم رہ گئے ہیں​

قافلے والے منزل پہ پہنچے
یہ نہ دیکھا کہ ہم رہ گئے ہیں

اب نہ اُٹھنا سرہانے سے میرے
اب تو گِنتی کے دَم رہ گئے ہیں

یہ گلی کس کی ہے اللّٰه اللّٰه
اُٹھتے اُٹھتے قدم رہ گئے ہیں

کائناتِ جفا و وفا میں
ایک تم، ایک ہم رہ گئے ہیں

دیکھ کر اُن کےمنگتوں کی غیرت
دَنگ اہلِ کرم رہ گئے ہیں

ہم سے اللّٰه والے کہاں اب
آپ جیسے صنم رہ گئے ہیں

دو قدم چل کے راہِ وفا میں
تھک گئے تم کہ ہم رہ گئے ہیں

وہ تو آ کر گئے بھی کبھی کے
دل پہ نقشِ قدم رہ گئے ہیں

آج ساقی پِلا شیخ کو بھی
اک یہی محترم رہ گئے ہیں

وہ گئے جن کے دَم سے تھی رونق
اور رہنے کو ہم رہ گئے ہیں

اُن کی ستّاریاں کچھ نہ پُوچھو
عاصیوں کے بھرم رہ گئے ہیں

دورِ ماضی کی تصویر آخر
اب نصیرؔ ایک ہم رہ گئے ہیں

دل نصیرؔ اُن کا تھا، لے گئے وہ
غم خدا کی قسم رہ گئے ہیں
پیر سیّد نصیرالدّین نصیرؔ شاہ گیلانی
Peer Sayed Naseer u Din Shah Gailani