Neelgon Aasman Ki Wusa'at se Koi Daikhy Mujhe Muhabbat Se

نیلگوں آسماں کی وسعت سے
کوئی دیکھے مجھے محبت سے

کوئی میری بھی سائبانی کرے
گھلتی جاتی ہوں میں تمازت سے

زندگی زرد کینوس ہے مری
رنگ بھرنے ہیں اِس میں چاہت سے

روشنی اُس کا استعارہ ہے
میں جسے چاہتی ہوں شدت سے

رشک آتا ہے اُس کی آنکھوں پر
دو ستارے ہیں خوبصورت سے

پیار کرنے کی مجھ کو عادت ہے
خوف آتا ہے اپنی عادت سے

تم کو لگتا ہے، وقت ٹھہرا ہے
زندگی کٹ رہی ہے عجلت سے

ہجر تیرا بھی اک قیامت تھا
کون ڈرتا ہے اب قیامت سے

میں کہ جاگی ہوئی ہوں صدیوں کی
مجھ کو سونا ہے تھوڑی فرصت سے

مخلصی سادگی کا دور گیا
لوگ ملتے ہیں اب ضرورت سے
ہما سحرش