Malal , Ranj o Alam Us Peh Hijar e Yar Alag Diya Hai Ishq Ne Is Dil Ko Izterar Alag

ملال، رنج و الم اس پہ ہجرِ یار الگ
دیا ہے عشق نے اِس دل کو اضطرار الگ

رگوں میں شور مچائے فشارِ خون جُدا
دُرونِ دل کوئی تڑپے ہے بار بار الگ

سماعتیں ہیں الگ آہٹوں پہ رکھی ہوئیں
پھر اس پہ آنکھ کو لاحق ہے انتظار الگ

عطائے عشق ہے جو بھی سنبھال رکھا ہے
دلِ فگار الگ روح تار تار الگ

پتہ چلے تمہیں معدوم ہوں تمہارے بنا
کرو جو خود کو کبھی مجھ سے ایک بار الگ

وہ ہمکلام ہے یا گُل سماعتوں میں کھلے
سُخن کا کیف الگ لہجے کا خمار الگ

گِنے بغیر ہے اک نام میرے وردِ زباں
سو رکھو دانۂ تسبیح کا شمار الگ

ہے اور زادِ سفر ہجر کی مسافت میں
جدا ہیں منزلیں اب کے، ہے رہگزار الگ

جدا تھا رنج شکستِ انا کا بھی نسرینؔ
لپٹ گئی مرے قدموں سے میری ہار الگ
نسرینؔ سید
Nasreen Sayed