Bojh Aalam Ke Koi Tou Sanbhaly Mere Aur Hathaili Se Meri Dard Uthaly Mere

بوجھ آلام کے کوئی تو سنبھالے میرے
اور ہتھیلی سے مِری درد اُٹھا لے میرے

آپ سے بڑھ کے بھلا کون مسیحا ہے مِرا
اس دعا نے ہی بڑے کام نکالے میرے

وہ جو خود کو مِرا غمخوار کہا کرتا تھا
عیب اُس نے بھی سرِ عام اچھالے میرے

دشتِ پُرخار میں تنہا نہیں ہوتی اب میں
ہمسفر جب سے ہوئے پاؤں کے چھالے میرے

زندگی میں مِرے اشعار سند ہوں کہ نہ ہوں
پر مِرے بعد یہ ٹھہریں گے حوالے میرے

مجھ کو تاریکئ حالات کا اب خوف نہیں
ظلمتِ شب پہ مُسلط ہیں اُجالے میرے

میرا چہرہ ابھی کچھ دیر کُھلا رہنے دو
مجھ کو آئیں گے کنول دیکھنے والے میرے
ریحانہ کنول