Kamre Mein Uske Aks Ki Taseer Reh Gai Woh Shakhs Tou Chala Gaya Tasweer Reh Gai
کمرے میں اُس کے عکس کی تاثیر رہ گئی
وہ شخص تو چلا گیا تصویر رہ گئی
بستر تو خالی ہوگیا بیمارِ غم کے بعد
تکیے پہ بس علاج کی تدبیر رہ گئی
اشکوں میں آرہا ہے نظر صاف ایک نام
پانی پہ کس کے ہاتھ کی تحریر رہ گئی
ایک ایک کرکے میر کے عُشّاق چل بسے
گلیوں میں داستانِ غم میر رہ گئی
خاموشیوں کے پار ہے کیسا یہ جلترنگ
کانوں میں کن صداؤں کی تاثیر رہ گئی
پھر ایک دن وہی ہُوا جس کا تھا ڈر ہمیں
فارس وہ شمع بُجھ گئی، تنویر رہ گئی
رحمان فارس
Rehman Faris
Comments
Post a Comment