Ik Butt Mujhe Bhi Gosha e Dil Mein Pada Mila Waiz Ko Weham Hai Keh Usi Ko Khuda Mila

اِک بُت مُجھے بھی گوشئہ دل میں پڑا مِلا
واعظ کو وہم ہے کہ اُسی کو خُدا مِلا
Ik Butt Mujhe Bhi Gosha e Dil Mein Pada Mila
Waiz Ko Weham Hai Keh Usi Ko Khuda Mila
حیرت ہے، اس نے اپنی پرستش ہی کیوں نہ کی
جب آدمی کو پہلے پہل آئینہ مِلا

خورشیدِ زندگی کی تمازت غضب کی تھی
تو راہ میں مِلا تو شجر کا مزہ مِلا

مُجھ سے بچھڑ کے یوسفِ بے کارواں ہے تو
مُجھ کو تو خیر درد مِلا تُجھ کو کیا مِلا

دن بھر جلائیں مَیں نے اُمیدوں کی مشعلیں
جب رات آئی گھر کا دِیا تک بُجھا مِلا

ماضی سے مُجھ کو یوُں تو عقیدت رہی مگر
اس راستے میں جو بھی نگر تھا لُٹا مِلا

دشتِ فراق میں وہ بصیرت مِلی ندیمؔ
جو مُجھ سے چھن گیا تھا، وہی جا بجا مِلا