Be Aah , Be Fughan Thay , Abhi Kal Ki Baat Hai Humraz , Hum-Zuban Thay Abhi Kal Ki Baat Hai

بے آہ، بے فغاں تھے، ابھی کل کی بات ہے
ہمراز، ہم زباں تھے ابھی کل کی بات ہے
Be Aah , Be Fughan Thay , Abhi Kal Ki Baat Hai
Humraz , Hum-Zuban Thay Abhi Kal Ki Baat Hai
لہجوں سے جن کے دل پہ خراشوں کے داغ ہیں
وہ کتنے مہرباں تھے  ابھی کل کی بات ہے
اس گلسِتانِ نور کو ہے دیکھنا محال
ہم جس کے باغباں تھے، ابھی کل کی بات ہے
ہیں آج اپنی ذات میں صحرا لیے ہوئے
ہم بحرِ بے کراں تھے، ابھی کل کی بات ہے
اب ہم زمیں سے ہوگئے تم آسماں ہوئے
ہم دونوں اک جہاں تھے، ابھی کل کی بات ہے
اکمل  کمالِ ضبط کی وہ بھی مثال تھا
تم بھی تو بے زباں تھے، ابھی کل کی بات ہے
اکمل الہ آبادی
Akmal Ilahbadi