Main Keh Do Roz Ka Mehman Tere Shehar Mein Tha Ab Chala Hon Tou Koi Faisla Kar Bhi Na Sakon

میں کہ دو روز کا مہمان تیرے شہر میں تھا
اب چلا ہوں تو کوئی فیصلہ کر بھی نہ سکوں
Main Keh Do Roz Ka Mehman Tere Shehar Mein Tha
Ab Chala Hon Tou Koi Faisla Kar Bhi Na Sakon
زندگی کی یہ گھڑی ٹوٹتا پُل ہو جیسے
کہ ٹھہر بھی نہ سکوں اور گُزر بھی نہ سکوں

مہرباں ہیں تیری آنکھیں مگر اے مونسِ جاں
اِن سے ہر زخمِ تمنا تو نہیں بھر سکتا
ایسی بے نام مُسافت ہو تو منزل کیسی
کوئی بستی ہو، بسیرا ہی نہیں کر سکتا

ایک مُدت ہوئی لیلائے وطن سے بِچھڑے
اب بھی رِستے ہیں مگر زخم پُرانے میرے
جب سے صَرصَر میرے گُلشن میں چلی ہے تب سے
برگِ آوارہ کی مانند ٹھکانے میرے

آج اِس شہر، کل اُس شہر کا رستہ لینا
ہائے کیا چیز غریب الوطنی ہوتی ہے
یہ سفر اِتنا مسلسل ہے کہ تھک ہار کے میں
بیٹھ جاتا ہوں جہاں چھاؤں گھنی ہوتی ہے

تو بھی ایسا ہی دِل آرام شجر ہے جِس نے
مُجھ کو اِس دَشتِ قیامت سے بچائے رکھا
ایک آشفتہ سر و آبلہ پا کی خاطر
کبھی زلفوں، کبھی پلکوں کو بچھائے رکھا

دُکھ تو ہر وقت تعاقب میں رہا کرتے ہیں
یوں پناہوں میں کہاں تک کوئی رہ سکتا ہے
کب تلک ریت کی دیوار سنبھالے کوئی
وہ تھکن ہے کہ میرا جِسم بھی ڈھے سکتا ہے

اجنبی لوگ، نئے لوگ، پرائی گلیاں
زندگی ایسے قرائن میں کٹے گی کیسے
تیری چاہت بھی مقدس، تیری قربت بھی بہشت
دیس پردیس کی تفریق گھٹے گی کیسے

ناگزیر آج ہُوا جیسے بِچھڑنا تیرا
کل کِسی روز مُلاقات بھی اِمکان میں ہے
میں یہ پیراہنِ جاں کیسے بدل سکتا ہوں
کہ تیرا ہاتھ میرے دِل کے گریبان میں ہے
احمد فرازؔ
Ahmad Faraz