Yeh Jeevan Jab Kahani Mangta Hai Tou Pehle Raeigani Mangta Hai

یہ جیون جب کہانی مانگتا ہے
تو پہلے رائیگانی مانگتا ہے
Yeh Jeevan Jab Kahani Mangta Hai
Tou Pehle Raeigani Mangta Hai
تپش الفت کی کر دیتی ہے کندن
یہ دل آتش فشانی مانگتا ہے

بنا کر دشت میری زندگانی
وہ دریا سی روانی مانگتا ہے

وہ ناٶ کاغذی، گڑیا، گھروندے
یہ دل یادیں پرانی مانگتا ہے

پجاری کی طرح چرنوں میں بیٹھا
سوالی مہربانی مانگتا ہے

عجب ہے وہ، دکھا کر دل کسی کا
نشاطِ جاودانی مانگتا ہے

نہیں اپنا نسب معلوم جس کو
وہ لڑکی خاندانی مانگتا ہے

رموزِ عشق سے واقف نہیں جو
وہ دل کی راجدھانی مانگتا ہے

بچھڑنے کا ستم کافی نہیں کیا
جو وہ مجھ سے نشانی مانگتا ہے

نہیں اشنال وہ یوسف کے جیسا
زلیخا سی دوانی مانگتا ہے
اشنال سید
Ashnal Syed