Batein Teri Ilham Hein Jadoo Teri Aawaaz Rag Rag Mein Utarti Hoi Khushbo Teri Aawaz

باتیں تیری الہام ہیں جادو تیری آواز
رگ رگ میں اترتی ہوئی خوشبو تیری آواز
Batein Teri Ilham Hein Jadoo Teri Aawaaz
Rag Rag Mein Utarti Hoi Khushbo Teri Aawaz
بہتے ہی چلے جاتے ہیں تہِ آب ستارے
جیسے کہیں اتری ہو لبِ جُو تیری آواز

پابندِ شب، کنج قفس میں میرا احساس
امید کی دُھندلی سی کرن تو، تیری آواز

میں شام غریباں کی اداسی کا مسافر
صحراؤں میں جیسے کوئی جگنو، تیری آواز

لفظوں میں چھپاۓ ہوۓ بے ربط دلاسے
چنتی رہی شب بھر میرے آنسو تیری آواز

بس ایک مرے شوق کی تسکین کی خاطر
کیا کیا نہ بدلتی رہی پہلو تیری آواز

یہ ہجر کی شب بھیگ چلی ہے کہ میرے بعد
روتی ہے کہیں کھول کے گیسو تیری آواز

دیکھوں تو وہی میں، وہی چپ چپ سے در و بام
سوچوں تو بکھر جاۓ ہر سُو تیری آواز

محسنؔ کے خیالوں میں اترتی ہے سرِ شام
رِم جھم کی طرح باندھ کے گھنگھرو تیری آواز