Ishq Hai Hijar Ka Aazar Mere Samne Hai Yak Na Shud Do Ki Yeh Takrar Mere Samne Hai

عشق ہے ہجر کا آزار مرے سامنے ہے
یک نہ شد دو کی یہ تکرار مرے سامنے ہے
Ishq Hai Hijar Ka Aazar Mere Samne Hai
Yak Na Shud Do Ki Yeh Takrar Mere Samne Hai
ایک تلوار پہ چلتے ہوئے نکلی گھر سے
اور اک دو رخی تلوار مرے سامنے ہے

ہائے کمبخت، مرا بخت ہی کاہل ہے ذرا
شاخچہ یوں تو ثمر بار مرے سامنے ہے

میں نے اک بار کہا تھا اسے جھوٹا تب سے
آئینہ برسرپیکار مرے سامنے ہے

رہبرِ شوق بھٹکنے سے بچا لے ورنہ
دھوپ میں سایۂ دیوار مرے سامنے ہے

اب میں اوقات میں رکھوں گی تجھے اے دنیا
اب مرے عشق کا پندار مرے سامنے ہے

کیوں نہ اک اور جہاں اپنا بنا لوں نرگس
بخت ہاتھوں میں ہیں، پرکار مرے سامنے ہے
نرگس جہاں زیب
Nargis Jahanzeb