Lazat See Pa Rahe Hein Gham Aashiqi Se Hum Kuch Waqt Aur Mangty Hein Zindagi Se Hum

لذت سی پا رہے ہیں غمِ عاشقی سے ہم
کچھ وقت اور مانگتے ہیں زندگی سے ہم
Lazat See Pa Rahe Hein Gham Aashiqi Se Hum
Kuch Waqt Aur Mangty Hein Zindagi Se Hum
جیسے تھے بزم میں نہ مخاطب کسی سے ہم
افسانہ ان سے کہہ گئے اس سادگی سے ہم
اس درجہ بڑھ گئے ہیں حدِ بے خودی سے ہم
اب تو اُسی کو پوچھ رہے ہیں اُسی سے ہم
رنگینیٔ فریبِ تبسم نہ پوچھئے
کس سادگی میں آ گئے کس سادگی سے ہم
حسنِ طلب ہے یہ کوئی دیوانگی نہیں
ہاں ہاں تجھی کو مانگ رہے ہیں تجھی سے ہم
دیکھا کبھی انہیں کبھی خود پر نگاہ کی
کھیلے ہیں موت سے تو کبھی زندگی سے ہم
رنگینئ حیات سرابِ حیات ہے
پیغام سن رہے ہیں یہ ہر اک کلی سے ہم
اے دل وہ آئیں بہر عیادت یقیں نہیں
الجھیں فضول کیوں نفس آخری سے ہم
ہوتی ہے اشکِ غم ہی سے تسکینِ شامِ غم
دل کی لگی بجھاتے ہیں دل کی لگی سے ہم
ہیں داغہائے دل کی شبِ غم نوازشیں
تاریکیوں میں کھیلتے ہیں چاندنی سے ہم
ذہن آزما ہے راز نیا روز اے شفاؔ
تنگ آ گئے ہیں سلسلۂ آگہی سے ہم
شفا گوالیاری
Shifa Gowalyari