Mere Hal Se Nahi Be-Khabar Mera Koozagar Keh Hai Shah-Rag Se Qareeb Tar Mera Koozagar
مرے حال سے نہیں بے خبر مرا کوزہ گر
کہ ہے شاہ رگ سے قریب تر مرا کوزہ گر
Mere Hal Se Nahi Be-Khabar Mera Koozagar
Keh Hai Shah-Rag Se Qareeb Tar Mera Koozagar
کبھی بخش دے مرے خد و خال کو تازگی
کبھی نوچ لے مرے بال و پر مرا کوزہ گر
کہیں جان جاں کہیں مہرباں کہیں راز داں
کہیں نکتہ بیں، کہیں نکتہ ور مرا کوزہ گر
مری خوبیوں مری خامیوں سے ہے بے خبر
نہیں بے بصر نہیں کم نظر مرا کوزہ گر
مرا آئنہ کبھی سنگ و خشت میں ڈھال دے
کبھی توڑ دے مجھے جوڑ کر مرا کوزہ گر
مجھے ایسے لگتا ہے میرے جسم کی خاک کو
ابھی اور رکھے گا چاک پر مرا کوزہ گر
مجھے راستوں کی صعوبتوں سے نہیں خطر
مرے ساتھ ہے مرا ہم سفر مرا کوزہ گر
وہی زخم دے وہی زخم دل کی دوا کرے
مرا مہرباں مرا چارہ گر مرا کوزہ گر
خورشید بیگ ملیسوی
Khusheed Beg Malesvi
Comments
Post a Comment