Yeh Chahatein Yeh Pazeeraiyan Bhi Jhooti Hein Yeh Umar Bhar Ki Shanasaiyan Bhi Jhooti Hein

یہ چاہتیں یہ  پذیرائیاں  بھی  جُھوٹی ہیں
یہ عمر بھر کی شناسائیاں بھی جُھوٹی ہیں
Yeh Chahatein Yeh Pazeeraiyan Bhi Jhooti Hein
Yeh Umar Bhar Ki Shanasaiyan Bhi Jhooti Hein
یہ لفظ لفظ محبّت کی یورشیں بھی فریب
یہ زخم زخم مسیحائیاں بھی جُھوٹی ہیں
مِرے جنُوں کی حقیقت بھی سر بسر جُھوٹی
تِرے جمال کی رعنائیاں بھی جُھوٹی ہیں
کُھلی جو آنکھ، تو دیکھا کہ شہرِ فُرقت میں
تِری مہک،  تِری پرچھائیاں بھی جُھوٹی ہیں
تِرے فراق کا اب بھی یقیں نہیں آتا
یہ رتجگے، مِری تنہائیاں بھی جُھوٹی ہیں
فریب کار ہیں اِظہار کے وسیلے بھی
خیال و فکر کی گہرائیاں بھی جُھوٹی ہیں
اُسے یہ دُکھ ، کہ میں رُسوا ہُوا ہوں اُس کے لیے
مجھے یہ دُکھ رہے، رُسوائیاں بھی جُھوٹی ہیں
تمام لفظ و معانی بھی جُھوٹ ہیں ساجد
ہمارے عہد کی سچائیاں بھی جُھوٹی ہیں
اعتبار ساجد
Aitbar Sajid