Gham tumhara tha zindagi goya Tum ko khhoya, usay nahi khhoya

غَم تُمہارا تھا زِندگی گویا
تُم کو کھویا، اُسے نہیں کھویا
Gham tumhara tha zindagi goya
Tum ko khhoya, usay nahi khhoya

 
فرطِ گِریہ سے جی نہ ہلکا ہو
بس یہی سوچ کر نہیں رویا
Fart e giriya se ji na halka ho
Bas yehi soch kar nahi roya

 
اَشک تو اَشک ہیں، شَراب سے بھی
میں نے یہ داغِ دِل نہیں دھویا
Ashk to ashk hain, sharab se bhi
Main ne ye dagh e dil nahi dhoya

 
میں وہ کشتِ نِشاط کیوں کاٹُوں
جِس کو میں نے کبھی نہیں بویا
Main wo kasht e nishat kyun kaatoon
Jis ko main ne kabhi nahi boya

 
آبلہ آبلہ تھی جاں پِھر بھی
بارِ ہستی کو عُمر بھر ڈھویا
Abla abla thi jan phir bhi
Baar e hasti ko umr bhar dhoya

 
دِیدہ و دِل گواہ ہیں جاناں
سُکھ سے جاگا، نہ چین سے سویا
Deedah o dil gawah hain janan
Sukh se jaga, na chain se soya

 
دُوسرا کوئی ساتھ ہو کہ نہ ہو
“تم میرے پاس ہوتے ہو گویا”
Dosra koi sath ho ke na ho
“Tum mere paas hote ho goya”

 
احمد فرازؔ
Ahmed Faraz