Rasta Bhi Khatin Dhoop Mein Shidat Bhi Buhat Thi Saaye Se Magar Usko Muhabbat Bhi Buhat Thi

رَستہ بھی کٹھن دُھوپ میں شِدّت بھی بہت تھی
سائے سے مگر ،،، اُس کو  مُحبّت  بھی  بہت  تھی
Rasta Bhi Khatin Dhoop Mein Shidat Bhi Buhat Thi
Saaye Se Magar Usko Muhabbat Bhi Buhat Thi
 خیمے  نہ  کوئی  میرے  مُسافِر   کے   جلائے
زخمی تھا بہت پاؤں ، مُسافت بھی بہت تھی
 سب  دوست  مِرے  منتظر   پردۂ   شب   تھے
دِن میں تو سفر کرنے میں دِقّت بھی بہت تھی
بارش کی دُعاؤں میں نمی آنکھ کی مِل جائے
 جذبے کی کبھی اِتنی رفاقت بھی بہت تھی
  کُچھ تو تِرے موسم ہی مُجھے راس کم آئے
اور کُچھ مِری مٹّی میں بغاوت بھی بہت تھی
  پُھولوں  کا  بِکھرنا  تو  مُقدر  ہی  تھا ،،،  لیکن
کُچھ اِس میں ہَواؤں کی سیاست بھی بہت تھی
وُہ بھی سرِ مقتل ہے کہ سچ جس کا تھا شاہد
  اور  واقفِ  احوال ، عدالت  بھی  بہت  تھی
اِس ترکِ  رفاقت  پہ  پریشاں  تو  ہُوں ، لیکن
اب تک کے تِرے ساتھ پہ حیرت بھی بہت تھی
خُوش  آئے  تُجھے ،،،  شہرِ  مُنافِق   کی   اَمیری
ہم لوگوں کو سَچ کہنے کی عادت بھی بہت تھی
پروینؔ شاکر
Parveen Shakir