Socha Tou Barha Keh Teri Aas Chod Doon Par Dil Nahi Kia Keh Teri Aas Chod Doon

سوچا تو بارہا کہ تری آس چھوڑ دوں
پر دل نہیں کیا کہ تری آس چھوڑ دوں
Socha Tou Barha Keh Teri Aas Chod Doon
Par Dil Nahi Kia Keh Teri Aas Chod Doon
ہر بار تجھ سے آس لگانا پڑی مجھے
ہر بار یوں لگا کہ تری آس چھوڑ دوں

ممکن نہیں تو کوئی دلاسہ نہ دے مگر
یوں بھی نہ پیش آ کہ تری آس چھوڑ دوں

کیا دُور، کیا قریب ہے، کیا دوست، کیا رقیب
ہر ایک نے کہا کہ تری آس چھوڑ دوں

یا آس پاس رہ کے مری دسترس میں ہو
یا اتنا دور جا کہ تری آس چھوڑ دوں

یہ بھی نہیں کہ تیرا مکمل ہو اعتبار
یہ بھی نہیں ہوا کہ تری آس چھوڑ دوں

احمد تمام عمر سمجھنے میں لگ گئی
آخر سمجھ گیا کہ تری آس چھوڑ دوں
احمد خلیل خان
Ahmad Khalil Khan