Has Ke Jindri Inj Hundai Kandiyan Naal Zakhman Di Tasweer Banayi Kandiyan Naal
ہس کے جندڑی انج ہنڈائی کنڈیاں نال
زخماں دی تصویر بنائی کنڈیاں نال
Has Ke Jindri Inj Hundai Kandiyan Naal
Zakhman Di Tasweer Banayi Kandiyan Naal
روندا سی تے پھلاں اتے لکھدا سی
نام کسے دا اک شیدائی کنڈیاں نال
جھٹ دا جھٹ ای سنگت مانی پھلاں دی
باقی دی میں فیر نبھائی کنڈیاں نال
ویکھیں کل نوں دتے ہوئے پھلاں دے
پھٹ نہ کرنے پین سلائی کنڈیاں نال
پھلاں کول میں ستاں ساں تے ڈردا ساں
پر اوہ جیہڑی نیندر آئی کنڈیاں نال
ہاسے دے وچ ادھڑ گئے، اس جسے دی
رو رو کیتی فر ترپائی کنڈیاں نال
دنیا ڈھل ڈھل پیندی سی جد پھلاں تے
میں اک فوٹو چا بنوائی کنڈیاں نال
فر جیون دی ساری چادر چھجدی گئی
ہاسے دے وچ یار اڑائی کنڈیاں نال
واہ واہ مالی صدقے تیری حکمت دے
پھل وی لیندے نیں انگڑائی کنڈیاں نال
پھلاں کولوں ایناں ڈریا ہویا ساں
وکھری اک جاگیر وسائی کنڈیاں نال
انج تے لوکاں پھلاں نال نبھائی نئیں
جسراں احمد ویکھ نبھائی کنڈیاں نال
بے وسی دی حد نہیں مک گئی احمد جی
اج اک تتلی میں دفنائی کنڈیاں نال
علی احمد گجراتی
Ali Ahmad Gujrati
Comments
Post a Comment