Logon ko yahan jan bachane ki pari hai Tum ho ke tumhen khhel khhilane ki pari hai

لوگوں کو یہاں جان بچانے کی پڑی ہے
تم ہو کہ تمہیں کھیل کھلانے کی پڑی ہے
Logon ko yahan jan bachane ki pari hai
Tum ho ke tumhen khhel khhilane ki pari hai

آنکھوں سے تو اٹھتے نہیں خوابوں کے جنازے
دل ہے کہ اسے ناز اٹھانے کی پڑی ہے
Ankhon se to uthte nahi khwabon ke janaze
Dil hai ke isay naz uthane ki pari hai

چھت ہے کہ ٹپکتی ہے کئی ایک جگہ سے
گھر کے در و دیوار سجانے کی پڑی ہے
Chhat hai ke tapakti hai kaiy aik jagah se
Ghar ke dar o deevar sajane ki pari hai

میں خون ِ جگر بیچنے جاتا ہوں شب و روز
طعنے یہی ملتے ہیں کمانے کی پڑی ہے
Main khoon e jigar bechne jata hoon shab o roz
Taane yehi milte hain kamane ki pari hai

دو پل میں کئی بار گھڑی دیکھ چکے ہو
آتے ہی تمہیں چھوڑ کے جانے کی پڑی ہے
Do pal mein kaiy baar ghhari dekh chuke ho
Atay hi tumhen chhor ke jane ki pari hai

سنتے ہو مگر کوئی توجہ نہیں دیتے
کنگن کو کلائی میں گھمانے کی پڑی ہے
Sunte ho magar koi tawajju nahi dete
Kangan ko kalaiy mein ghhumane ki pari hai

اک چپ سے لرز جائیں یہاں کان کے پردے
پھر بھی تمہیں آواز دبانے کی پڑی ہے
Ek chup se laraz jayen yahan kan ke parde
Phir bhi tumhen awaz dabane ki pari hai

ہم تاک میں بیٹھے ہیں، لگے ہاتھ یہ دشمن
اور تم کو یہاں ہاتھ ملانے کی پڑی ہے
Hum taak mein baithe hain, lage hath ye dushman
Aur tum ko yahan hath milane ki pari hai

احمد خلیل خان
Ahmed Khalil Khan