Zindagi , Pavoun Na Dhar Janib e Anjam Abhi Mere Zimay Hein Adhore Se Kai Kam Abhi

زندگی، پاؤں نہ دَھر جانبِ انجام ابھی
میرے ذمّے ہیں ادُھورے سے کئی کام ابھی
Zindagi , Pavoun Na Dhar Janib e Anjam Abhi
Mere Zimay Hein Adhore Se Kai Kam Abhi
ابھی تازہ ہے بہت، گھاؤ بِچھڑ جانے کا
گھیر لیتی ہے، تِری یاد سَرِشام ابھی

اِک نظر اور اِدھر دیکھ مسیحا میرے
تیرے بِیمار کو آیا نہیں آرام ابھی

رات آئی ہے تو کیا، تُم تو نہیں آئے ہو
میری قِسمت میں، کہاں لِکھّا ہے آرام ابھی

جان دینے میں کرُوں دیر، یہ مُمکن ہے کہاں
مُجھ تک آیا ہے، مِری جاں! تِرا پیغام ابھی

طائرِ دِل کے ذرا پَر تو نِکل لینے دو
اِس پرندے کو بھی آنا ہے تہِ دام ابھی

توڑ سکتا ہے مِرا دِل یہ زمانہ، کیسے
میرے سِینے میں دھڑکتا ہے تِرا نام ابھی

میرے ہاتھوں میں ہے موجُود تِرے ہاتھ کا لمس
دِل میں برپا ہے اُسی شام کا کُہرام ابھی

میری نظریں کریں کیسے تِرے چہرے کا طواف
میری آنکھوں نے تو، باندھے نہیں احرام ابھی