Khud Aap Apni Madah Saraai Mein Pad Gaya Kia Acha Aadmi Tha , Buraai Mein Pad Gaya

خود آپ اپنی مدح سرائی میں پڑ گیا
کیا اچھا آدمی تھا، بُرائی میں پڑ گیا
Khud Aap Apni Madah Saraai Mein Pad Gaya
Kia Acha Aadmi Tha , Buraai Mein Pad Gaya
کیا نازکی تھی اس کی کہ چُھوتے ہی پھول کو
اک آبلہ سا دستِ حنائی میں پڑ گیا

میری طرح سے تُو بھی اسیری کا لطف لے
بیکار میں ہی فکرِ رہائی میں پڑ گیا

نمرود کو جہان میں کوئی کمی نہ تھی
لیکن وہ شخص خبطِ خدائی میں پڑ گیا

کب تک بھلا ٹھٹھرتا ہوا دیکھتا اسے
چپ چاپ آ کے میں تو رضائی میں پڑ گیا

دنیا میں ایک دل ہی ہمارا وکیل تھا
کمبخت وہ بھی صلح صفائی میں پڑ گیا

اس شہر میں یہی تو منافعے کا کام ہے
یوں ہی نہیں وہ کارِ گدائی میں پڑ گیا
کاشف حسین غائر
Kashif Husain Ghair